Astana qalasy máslıhatynyń depýtattary «Áreket etý ýaqyty» ózin-ózi basqarý kóshbasshylarynyń respýblıkalyq quryltaıyna qatysýshylarmen kezdesip, áleýmettik bastamalardy talqylady, dep habarlaıdy elorda ákimdiginiń resmı saıty.
Is-sharaǵa QR óńirlerinen mektep parlamentteriniń 20-ǵa jýyq prezıdenti men elordalyq máslıhat depýtattary qatysty. Ashylý saltanatynda Astana qalasy máslıhaty tóraǵasynyń m.a. Asqar Smaǵulov quttyqtaý sóz sóıledi.
«Búgin biz jastardy, mektep qaýymyn tolǵandyratyn máselelerdi talqylaý úshin jınaldyq. Áriptesterim máslıhattyń qyzmeti týraly aıtyp, óz tájirıbelerimen bólisedi. Sizderdiń árqaısyńyz óz mektebińizde túrli máseleler men qıyndyqtarǵa kezigip, olardy sheshýdiń biregeı joldaryn taýyp, jańa ıdeıalar engizip, mektep ómirin qyzyqty ári mazmundy etýge kómektesetin is-sharalar men jobalardy uıymdastyryp jatqandaryńyzǵa senimdimin. Sizderdiń kúsh-jigerlerińiz qazirdiń ózinde jemisin berip jatyr, biraq bul sapardyń basy ǵana ekenin túsiný mańyzdy», - dedi ol.
Asqar Smaǵulov sondaı-aq mundaı kezdesýler jastar úshin ózekti máselelerdi jaqsy túsinýge yqpal etetinin jáne qalalyq deńgeıde sheshim qabyldaý júıesi týraly bilýge kómektesetinin atap ótti.
«Qurmetti qatysýshylar, osy ýaqytty belsendi paıdalanýǵa shaqyramyn: jobalaryńyzben, tájirıbelerińizben bólisińiz, suraqtar qoıýdan qoryqpańyz, tolǵandyratyn taqyryptardy talqylańyz. Bul kezdesý sizge jańa dostar men pikirlesterdi tabýǵa, sizdiń umtylystaryńyzda jalǵyz emes ekenińizdi, álemdi jaqsyraq etýdi qalaıtyn jáne basqa jigitterdiń bar ekenin kórýge múmkindik bolsyn. Al biz óz kezegimizde sizderdiń ıdeıalaryńyzdyń júzege asýyn jeńildetip, isterińizde tabysqa jetýge bar kúshimizdi salamyz», – dep túıindedi sózin Asqar Smaǵulov.
Is-sharany uıymdastyrýshylar atap ótkendeı, kezdesýdiń negizgi maqsaty – jastar men máslıhat ókilderi arasyndaǵy baılanysty nyǵaıtý, sondaı-aq balalar men jasóspirimderdiń áleýmettik bastamalarǵa belsendi qatysýy úshin jaǵdaı jasaý.
