29 قازان كۇنى قازاقشا-موڭعولشا، موڭعولشا-قازاقشا سوزدىكتەرى جارىق كوردى، دەپ حابارلايدى "ادىرنا" ۇلتتىق پورتالى.
ۇلانباتىر قالاسىندا ايگىلى التايست عالىم بازىلحان بۇقاتۇلى مەن تۇركى اكادەمياسىنىڭ ساراپشىسى ءناپىل بازىلحان قۇراستىرعان "قازاقشا-موڭعولشا سوزدىك" جانە "موڭعولشا-قازاقشا سوزدىك" جارىق كوردى. سوزدىكتەردىڭ جارىق كورۋى قازاقستان رەسپۋبليكاسى پرەزيدەنتى قاسىم-جومارت توقاەۆتىڭ موڭعولياعا مەملەكەتتىك ساپارى كەزىندە جۇزەگە اسقان قازاقستان مەن موڭعوليا اراسىنداعى مادەني جانە عىلىمي ىنتىماقتاستىقتىڭ ءبىر كورىنىسى بولىپ تابىلادى. بۇل ماڭىزدى ەڭبەكتى جاريالاۋعا موڭعوليا پرەزيدەنتى ۋحنااگين حۇرەلسۇح تىكەلەي قولداۋ كورسەتتى.
قوس سوزدىكتىڭ العىسوزىن موڭعوليا پرەزيدەنت كەڭسەسىنىڭ باسشىسى گومبوجاۆىن زاندانشاتار جازعان. ارقايسىسىندا شامامەن 60 مىڭ ءسوز قامتىلعان بۇل سوزدىكتەر – التايستيكا، تۇركولوگيا، قازاقتانۋ جانە موڭعولتانۋ سالالارى بويىنشا زەرتتەۋلەرگە قاجەتتى لەكسيكوگرافيالىق تالاپتارعا ساي قۇراستىرىلعان قۇندى عىلىمي ەڭبەك.
سوزدىكتى باسپاعا دايىنداۋ ءىسىن ۇيىمداستىرۋدا موڭعوليا پرەزيدەنتى جانىنداعى ءتىل ساياساتى ۇلتتىق كەڭەسىنىڭ جانە رەسمي ىستەر باسقارماسى جەتەكشىسى، فيلولوگيا عىلىمدارىنىڭ دوكتورى (PhD) نيامحۇۇگين نارانگەرەل جەتەكشىلىك ەتتى. بۇل باسىلىمدار قازاقستان مەن موڭعوليا حالىقتارىنىڭ اراسىنداعى مادەني جانە عىلىمي بايلانىستاردى نىعايتىپ، الداعى ۋاقىتتا دا ەكى ەلدىڭ اراسىنداعى دوستىقتى ودان ءارى تەرەڭدەتە تۇسەدى دەپ كۇتىلۋدە.
