ءبىزدىڭ بۇگىنگى كەيىپكەرىمىز – نۇرداۋلەت قۇداباي، قازاقستان ۇلتتىق گۆاردياسىنىڭ «ورتالىق» وڭىرلىك قولباسشىلىعىنا قاراستى 3517 اسكەري ءبولىمىنىڭ ستەپنوگورسك قالاسىنداعى ساربازى. قاتارداعى جاۋىنگەر قۇداباي ءوز قىزمەتتەستەرىمەن سالىستىرعاندا بويشاڭدىعىمەن ەرەكشەلەنەدى – ونىڭ بويى 2 مەتر 4 سانتيمەتر. شىمكەنت قالاسىنان شاقىرىلعان سارباز بيىكتىگىن اتا-اناسىنان مۇراعا العان، ولاردىڭ بويى دا 1 مەتر 80 سانتيمەتردەن اسادى. نۇرداۋلەت – وتباسىنداعى ءتورت بالانىڭ كەنجەسى. ونىڭ ۇلكەن اعاسى دا ۇزىن بويلى، ال ەكىنشى اعاسى مەن اپكەسى ودان ءسال تومەن بولعانىمەن، ولار دا كوپشىلىك اراسىندا كوزگە بىردەن تۇسەدى. بۇل گەنەتيكالىق ەرەكشەلىك اكەسىنىڭ اتا-اجەسىنەن بەرىلگەن.
"اكەمنىڭ اتا-اناسى دا ۇزىن بويلى. سوندىقتان بۇل – ءبىزدىڭ وتباسىلىق ەرەكشەلىگىمىز", – دەپ ماقتانىشپەن ايتادى نۇرداۋلەت.
قاتارداعى قۇداباي قىزمەتىن وزگەلەر سياقتى ەشبىر ارتىقشىلىقسىز وتەپ ءجۇر. ونىڭ توسەگى 2 مەتر 5 سانتيمەتر ۇزىندىقتا، گۆاردياشى وعان تولىعىمەن سىيىپ جاتادى.
"باسىندا ۇيرەنشىكتى ەمەس ەدى، بارلىعى مەنى كورىپ تاڭدانىپ، بويىمنىڭ قانشا ەكەنىن سۇرايتىن", – دەيدى نۇرداۋلەت.
بويدىڭ بيىك بولۋىنىڭ ارتىقشىلىقتارى مەن كەمشىلىكتەرى دە بار ەكەن. مىسالى، نۇرداۋلەت جاقسى سپورتشى، ۆولەيبولدى شەبەر وينايدى. ال ازاماتتىق ومىردە كيىم تاڭداۋدا قيىندىقتارعا ءجيى تاپ بولادى ەكەن. الايدا، اسكەري ءبولىم قويماسىنان 56 ولشەمدەگى فورما مەن 48 ولشەمدەگى باتەڭكە تابىلعان. ال تومەن ەسىكتەردەن وتكەندە باسىن شالقايتىپ جۇرۋىنە تۋرا كەلەدى.
اسكەرگە كەلگەنگە دەيىن ول شىمكەنتتەگى ورتالىق ازيا يننوۆاتسيالىق ۋنيۆەرسيتەتىندە وقىعان، بىراق ءوز قالاۋىمەن ازاماتتىق پارىزىن ورىنداۋ ءۇشىن وقۋىن ۋاقىتشا توقتاتىپتى. قاتارلاستارى ونىڭ بويىنىڭ بيىك بولۋ قۇپياسىن ءجيى سۇرايدى ەكەن، ال نۇرداۋلەت كۇلىپ: «بۇل جەردە گەندەر كەز كەلگەن جاتتىعۋدان كۇشتى!» – دەپ جاۋاپ بەرەدى.
قاتارلاستارى ونى «ءبولىمنىڭ ماياگى» دەپ ازىلدەيدى، ويتكەنى ونى الىستان-اق كورۋگە بولادى. بىراق ول رەنجىمەيدى جانە بويىنىڭ بيىكتىگىن تەك سىرتقى ەرەكشەلىك قانا ەمەس، وتان الدىنداعى جوعارى جاۋاپكەرشىلىكتىڭ سيمۆولى دەپ سانايدى.
قىزمەت مەرزىمى اياقتالعان سوڭ، نۇرداۋلەت وقۋىنا ورالىپ، ءبىلىمىن جالعاستىرۋدى ارماندايدى. دەگەنمەن، ول بۇل اسكەردەگى جىلىن ءومىر بويى ەستە ساقتايتىنىن ايتادى. اسكەر – ناعىز ءومىر مەكتەبى!
