ورالدا انت بەرگەنىنە 10 كۇن بولعان سارباز پسيحيكالىق ورتالىقتان ءبىر شىقتى. ول 2022 جىلدىڭ ماۋسىم ايىندا اسكەر قاتارىنا شاقىرىلعان، ورالداعى 5517 اسكەري بولىمىنە اقتوبە وبلىسىنان كەلگەن. بۇل تۋرالى Zakon.kz جاريالادى، دەپ حابارلايدى “ادىرنا” ۇلتتىق پورتالى.
ول شىلدە ايىنىڭ سوڭىندا انت قابىلداپ، 10 كۇننەن كەيىن وبلىستىق پسيحونەۆرولوگيالىق ديسپانسەرگە تۇسكەن. ساربازدىڭ تۋىستارى كەلەسى كۇنى ورالعا كەلگەن.
“بىرەۋمەن توبەلەسىپ قالدى دەپ ويلايمىز. ارمانبەك ءوزىن ول جەردەن الىپ كەتۋىمىزدى ءوتىندى. بۇعان دەيىن اتتان قۇلاعان، ميى شايقالعان. اسكەرگە الىپ كەتكەن كەزىندە ءتىپتى تەكسەرۋدەن دە وتپەگەن ەكەن. ءبىز ونى الىپ كەتكىمىز كەلەدى، ونىڭ قاتتى سوققىعا جىعىلعانىنا سەنەمىز، بىراق ولار سويلەسكىسى كەلمەيدى”، - دەيدى جاۋىنگەردىڭ تۋىسى تويبازار امانباەۆ.
5517 اسكەري ءبولىمىنىڭ كومانديرى قاتارداعى جاۋىنگەر ارمانبەك قايروشتىڭ 9 تامىزدا فەلدشەرلىك پۋنكتكە بارعانىن ايتادى. ونىڭ ايتۋىنشا، جاس جىگىت وزىنە قول سالاتىنى تۋرالى كوپشىلىكتىڭ كوزىنشە مالىمدەگەن. كومانديرى ونى فەلدشەرلىك پۋنكتكە اكەلىپ، اكت جاساتقان، اسكەري پوليتسيا دەنەسىندە ۇرىپ-سوعۋ بەلگىلەرىنىڭ جوقتىعىن تىركەگەن.
ۇلتتىق ۇلاننىڭ «باتىس» وڭىرلىك قولباسشىلىعىنىڭ باسشىلىعى 9 تامىزدا ساپتاۋ الاڭىندا جىگىتتىڭ ءجونسىز مىنەز-قۇلىق تانىتا باستاعانىن ايتادى.
ء“بىز ونى فەلدشەرلىك پۋنكتكە وقشاۋلادىق، ول جەردە ءبىزدىڭ پسيحولوگ ونىمەن سويلەسىپ، پسيحياتردىڭ كەڭەسىنە جۇگىنۋ قاجەتتىگىن حابارلادى. پسيحياتر ساربازعا «بەيىمدەلۋدىڭ بۇزىلۋى» دياگنوزىن قويىپ، اۋراحاناعا جاتقىزۋ تۋرالى شەشىم قابىلداندى. بۇل ماتەريال اسكەري پوليتسيادا تىركەلدى، قىزمەتتىك تەرگەۋ تاعايىندالدى، ولار فيزيكالىق ساراپتاما جۇرگىزدى. ءبىز ونى پسيحياترعا كورسەتۋگە مىندەتتى بولدىق. ويتكەنى ءبىز مۇنداي جاۋاپكەرشىلىكتى موينىمىزعا الا المايمىز. ەرتەڭ قارۋ الىپ ءجۇرىپ، اتىس الاڭىنا بارىپ، قۇداي ساقتاسىن، وزىنە بىردەڭە جاساۋى مۇمكىن”، - دەدى ۇلتتىق ۇلاننىڭ «باتىس» وڭىرلىك قولباسشىلىعى قولباسشىسىنىڭ ورىنباسارى باقىت الازوۆ.
الايدا ول دياگنوزدىڭ الدىن الا قويىلعانىن اتاپ ءوتتى. ەندى سارباز ەكى اي ەمدەلەدى، سودان كەيىن ول اسكەري-دارىگەرلىك كوميسسياعا جىبەرىلەدى. كوميسسيا مۇشەلەرى ونىڭ قىزمەتىن جالعاستىرا الاتىنىن نەمەسە جالعاستىرا المايتىنىن شەشەدى.
بۇعان دەيىن ۇلتتىق ۇلان ورال قالاسىندا 10 اسكەري قىزمەتشىنىڭ پسيحيكالىق ورتالىققا جاتقىزىلعانى تۋرالى اقپارات جوققا شىعارىلدى. ورتالىقتا جالعىز سارباز جاتقانى بەلگىلى بولدى.
”ادىرنا” ۇلتتىق پورتالى
