استانادا ءۇشىنشى حالىقارالىق «تەاتر اLL» حالىقارالىق تەاتر فەستيۆالىنىڭ شىمىلدىعى ءتۇرىلدى.
ءداستۇرلى ونەر مەرەكەسى بيىل اباي اتىنداعى مەملەكەتتىك سىيلىقتىڭ يەگەرى، جازۋشى-دراماتۋرگ روزا مۇقانوۆانىڭ شىعارماشىلىعىن ارقاۋ ەتتى. «ماڭگىلىك بالا بەينە»، «فاريزا»، «بوپاي حانىم»، «ساررا». بۇگىندە روزا مۇقانوۆاداي تەاتر ءۇشىن ءوندىرتىپ جازعان قالامگەرلەر نەكەن-ساياق.
ول تەاتر قورجىنىن نەبىر تاعىلىمدى تۋىندىلارىمەن بايىتقان قۋاتتى قالام يەسى.
روزا مۇقانوۆا، جازۋشى-دراماتۋرگ، قازاقستاننىڭ ەڭبەك سىڭىرگەن قايراتكەرى: -«جازۋدا جالعان بولمايدى. جازۋدا اقيقات بولادى. جاننىڭ تازالىعى بولادى.
مەن تىم جاس كەزىمدە، وتىزعا تولماعان شاعىمدا «ماڭگىلىك بالا بەينە» دەگەن پەسامدى قارا شاڭىراق مۇحتار اۋەزوۆ اتىنداعى قازاق دراما تەاترىنىڭ مارقۇم بولات اتاباەۆ دەگەن رەفورماتور، رەجيسسەرى مەنىڭ جاستىعىما قاراماي ساحناعا شىعاردى. ال، اۋەزوۆ تەاترىندا تەك قانا كلاسسيكتەر قويىلاتىن.
بۇگىنگى حالىقارالىق فەستيۆالگە مۇحتار اۋەزوۆتىڭ «قارالى سۇلۋىنىڭ» كەزىندە ينستسەنيروۆكاسىن جاساعان بولاتىنمىن. قىرعىز تەاترى سول شىعارما جەلىسىندەگى قويىلىمىن الىپ كەلدى. ازەربايجان تەاترى «شاتىر استىنداعى مەن» تراگيكومەدياسىن الىپ كەلدى. بۇل ءبىزدىڭ كورەرمەندەردىڭ قولى جەتە بەرمەگەن شىعارمالار. سوندىقتان تەاتردىڭ ەسىگى اشىق، سپەكتالدى كورۋگە كەلىڭىزدەر!» - دەدى.
فەستيۆالدىڭ اشىلۋ سالتاناتى الدىندا ارتيستەر مەن قاتىسۋشىلار قىزىل كىلەممەن ءجۇرىپ ءوتتى. ال مۇحتار اۋەزوۆ اتىنداعى قازاق ۇلتتىق دراما تەاترى ازىرلەگەن «ماڭگىلىك بالا بەينە» سپەكتاكلىمەن اشىلدى. جالپى اۆتوردىڭ دا دراماتۋرگياعا سارا جولى اتالمىش قاراشاڭىراقتا تەاتر كەمەڭگەرى بولات اتاباەۆتىڭ اق باتاسىمەن باستالعان بولاتىن.
اسحات ماەميروۆ، مۋزىكالىق جاس كورەرمەن تەاترىنىڭ ديرەكتورى، قازاقستاننىڭ ەڭبەك سىڭىرگەن قايراتكەرى:
- «بۇگىن ءبىز ءبىر اپتا بويى استانا قالاسىنىڭ اكىمدىگى، مادەنيەت باسقارماسى، مادەنيەت جانە اقپارات مينيسترلىگىنىڭ قولداۋىمەن ۇلكەن تەاتر مەرەكەسىن سالتاناتتى تۇردە اشىپ جاتىرمىز. بۇل فەستيۆالدىڭ ءمان ماعىناسى، بارشامىزعا انىق، ايقىن. ەلدىڭ ىقىلاسىنا بولەنگەن جازۋشى-دراماتۋرگ روزا مۇقانوۆانىڭ شىعارماشىلىعىنا ارنالادى.
تۇركى دۇنيەسى، تۇركى مادەني كەڭىستىگىندە دە روزا مۇقانوۆانىڭ تۋىندىلارى شوقتىعى بيىك. «ماڭگىلىك بالا بەينە»، «سارا»، «بوپاي حانىم» وسى قويىلىمداردىڭ بارلىعى دا رۋحاني قۇندىلىعىمىزدى دارىپتەيتىن ومىرشەڭ تۋىندىلارعا اينالدى. فەستيۆالدىڭ ماقساتى دا سول، روزا مۇقانوۆانىڭ دراماتۋرگياسىن دارىپتەۋ. وسى جولى جاڭا ەسىمدەردى اشقىمىز كەلەدى، اسىرەسە، رەجيسسۋرادا نە بولىپ جاتىر؟!» - دەدى.
ەلىمىزدىڭ تۇكپىر-تۇكپىرىنەن جينالعان بەلدى ۇجىمدار مەن قىرعىزستان، ازەربايجاننان كەلگەن ارتيستەر ءبىر اپتا بويىنا باس قالاداعى ساحنالاردا ونەر كورسەتەدى. ال ولاردىڭ قارىم-قابىلەتىن كوزىقاراقتى كورەرمەنمەن بىرگە، ءاليا بوپەجانوۆا، امانگەلدى مۇقان، انار ەركەباي سىندى بەلگىلى مادەنيەت مايتالماندارى باعالايدى.
ەسكە سالا كەتەيىك، اتالعان حالىقارالىق تەاتر فەستيۆالى 3 قاراشاعا دەيىن جالعاسادى.
