Astanada úshinshi halyqaralyq «TEATR ALL» Halyqaralyq teatr festıvaliniń shymyldyǵy túrildi.
Dástúrli óner merekesi bıyl Abaı atyndaǵy memlekettik syılyqtyń ıegeri, jazýshy-dramatýrg Roza Muqanovanyń shyǵarmashylyǵyn arqaý etti. «Máńgilik bala beıne», «Farıza», «Bopaı hanym», «Sarra». Búginde Roza Muqanovadaı teatr úshin óndirtip jazǵan qalamgerler neken-saıaq.
Ol teatr qorjynyn nebir taǵylymdy týyndylarymen baıytqan qýatty qalam ıesi.
Roza Muqanova, jazýshy-dramatýrg, Qazaqstannyń eńbek sińirgen qaıratkeri: -«Jazýda jalǵan bolmaıdy. Jazýda aqıqat bolady. Jannyń tazalyǵy bolady.
Men tym jas kezimde, otyzǵa tolmaǵan shaǵymda «Máńgilik bala beıne» degen pesamdy qara shańyraq Muhtar Áýezov atyndaǵy qazaq drama teatrynyń marqum Bolat Atabaev degen reformator, rejısseri meniń jastyǵyma qaramaı sahnaǵa shyǵardy. Al, Áýezov teatrynda tek qana klassıkter qoıylatyn.
Búgingi halyqaralyq festıvalge Muhtar Áýezovtiń «Qaraly sulýynyń» kezinde ınsenırovkasyn jasaǵan bolatynmyn. Qyrǵyz teatry sol shyǵarma jelisindegi qoıylymyn alyp keldi. Ázerbaıjan teatry «Shatyr astyndaǵy men» tragıkomedııasyn alyp keldi. Bul bizdiń kórermenderdiń qoly jete bermegen shyǵarmalar. Sondyqtan teatrdyń esigi ashyq, spektaldi kórýge kelińizder!» - dedi.
Festıvaldiń ashylý saltanaty aldynda artıster men qatysýshylar qyzyl kilemmen júrip ótti. Al Muhtar Áýezov atyndaǵy qazaq ulttyq drama teatry ázirlegen «Máńgilik bala beıne» spektaklimen ashyldy. Jalpy avtordyń da dramatýrgııaǵa sara joly atalmysh qarashańyraqta teatr kemeńgeri Bolat Atabaevtyń aq batasymen bastalǵan bolatyn.
Ashat Maemırov, Mýzykalyq jas kórermen teatrynyń dırektory, Qazaqstannyń eńbek sińirgen qaıratkeri:
- «Búgin biz bir apta boıy Astana qalasynyń ákimdigi, Mádenıet basqarmasy, Mádenıet jáne aqparat mınıstrliginiń qoldaýymen úlken teatr merekesin saltanatty túrde ashyp jatyrmyz. Bul festıvaldiń mán maǵynasy, barshamyzǵa anyq, aıqyn. Eldiń yqylasyna bólengen jazýshy-dramatýrg Roza Muqanovanyń shyǵarmashylyǵyna arnalady.
Túrki dúnıesi, túrki mádenı keńistiginde de Roza Muqanovanyń týyndylary shoqtyǵy bıik. «Máńgilik bala beıne», «Sara», «Bopaı hanym» osy qoıylymdardyń barlyǵy da rýhanı qundylyǵymyzdy dáripteıtin ómirsheń týyndylarǵa aınaldy. Festıvaldiń maqsaty da sol, Roza Muqanovanyń dramatýrgııasyn dáripteý. Osy joly jańa esimderdi ashqymyz keledi, ásirese, rejıssýrada ne bolyp jatyr?!» - dedi.
Elimizdiń túkpir-túkpirinen jınalǵan beldi ujymdar men Qyrǵyzstan, Ázerbaıjannan kelgen artıster bir apta boıyna bas qaladaǵy sahnalarda óner kórsetedi. Al olardyń qarym-qabiletin kóziqaraqty kórermenmen birge, Álııa Bópejanova, Amangeldi Muqan, Anar Erkebaı syndy belgili mádenıet maıtalmandary baǵalaıdy.
Eske sala keteıik, atalǵan Halyqaralyq teatr festıvali 3 qarashaǵa deıin jalǵasady.
