16 جاستاعى شەرزات پولاتتىڭ ءىسى قىلمىستىق كودەكستىڭ بەس بابى بويىنشا تەرگەلىپ جاتىر. بۇل تۋرالى ىشكى ىستەر ءمينيسترى ەرجان سادەنوۆ ءماجىلىس دەپۋتاتتارىنىڭ ساۋالىنا بەرگەن جاۋابىندا ايتتى، دەپ حابارلايدى «ادىرنا» ءتىلشىسى.
«تالعار قالاسىندا بولعان ش.پولاتتىڭ ولىمىنە قاتىستى الماتى وبلىسىنىڭ پوليتسيا دەپارتامەنتى قىلمىستىق كودەكستىڭ 99-بابى 2-بولىگى (ادام ءولتىرۋ), 293-بابى 3-بولىگى (بۇزاقىلىق), 115-بابى (قورقىتۋ), 432-بابى (قىلمىستى جاسىرىپ قالۋ) جانە 434-بابىمەن (قىلمىس تۋرالى حابارلاماۋ) قىلمىستىق ىستەردى تىركەپ، تەرگەپ جاتىر. تەرگەۋ بارىسى مەنىڭ جەكە باقىلاۋىمدا، وقيعا ورنىندا مينيسترلىكتىڭ ورتالىق اپپاراتىنىڭ قىزمەتكەرلەرى دە جۇمىس ىستەپ ءجۇر»، - دەلىنگەن جاۋاپتا.
مينيستر «قاساقانا كىسى ولتىرۋگە قاتىستى» دەگەن كۇدىكپەن سەگىز ادام، «قىلمىس تۋرالى حابارلاماۋ» بابى بويىنشا ءۇش ادام سوت سانكتسياسىمەن قامالعانىن اتاپ ءوتتى.
ەستەرىڭىزگە سالايىق، 4 قازان كۇنى تالعار قالاسىندا توبەلەس بولىپ، 16 جاستاعى شەرزات پولات كىسى قولىنان قازا تاپقان ەدى.
