ەلورداداعى دوستىق ۇيىندە وتكەن كونفەرەنتسيادا قازاقستاندا مەدياتسيا ينستيتۋتىن دامىتۋ ماسەلەلەرى تالقىلاندى، دەپ حابارلايدى استانا اكىمدىگىنىڭ رەسمي سايتى.
ۇيىمداستىرۋشىلاردىڭ ايتۋىنشا، بۇل شارانىڭ ماقساتى – وتباسىنداعى داۋلى جانە جانجالدى جاعدايلاردى شەشۋدە مەدياتسيانى قولدانۋدىڭ كەلەشەگى، سونداي-اق تۇرمىستىق زورلىق-زومبىلىقتىڭ الدىن الۋ.
«ءبىزدىڭ كونفەرەنتسيا رەسپۋبليكا كۇنىنە ارنالعان. ءبىز وعان كوپتەن بەرى دايىندالىپ، مىقتى سپيكەرلەردى شاقىردىق. سونىمەن، قحا رەسپۋبليكالىق مەدياتسيا كەڭەسىنىڭ توراعاسى، قازاقستان رەسپۋبليكاسى پرەزيدەنتى جانىنداعى ۇلتتىق قۇرىلتايدىڭ مۇشەسى شەرزود پۋلاتوۆ مەدياتورلاردىڭ زاڭدى جاۋاپكەرشىلىگىنە توقتالدى. وتباسىلىق مەدياتسيا سياقتى وزەكتى تاقىرىپ قىزۋ تالقىلاندى. وكىنىشكە قاراي، سوڭعى كەزدەرى وتباسىلىق زورلىق-زومبىلىققا بايلانىستى اتىشۋلى قىلمىستار ءجيى بولىپ جاتىر. مەدياتسيا كوپتەگەن ماسەلەلەردى وركەنيەتتى تۇردە، جانجالسىز، اگرەسسياسىز شەشۋگە مۇمكىندىك بەرەدى. ول مىسالى، مۇرانى ءبولۋ، اجىراسۋ سياقتى جاعدايلاردا دا ماڭىزدى قۇرال بولىپ سانالادى»، - دەدى كونفەرەنتسيا مودەراتورى، زاڭگەر جانە استانا قالالىق قحا دوستىق ءۇيىنىڭ مەدياتورى روزا بەكىشەۆا.
ونىڭ ايتۋىنشا، دوڭگەلەك ۇستەل بارىسىندا ازاماتتىق-قۇقىقتىق قاتىناستاردان تۋىندايتىن داۋلاردى شەشۋدە، سونداي-اق ۇلتارالىق جانجالداردى شەشۋدە مەدياتسيانى قولدانۋ سياقتى تاقىرىپتار دا قوزعالدى.
«مەدياتسيانىڭ قاعيداتتارى – داۋلاسۋشى تاراپتاردىڭ ءوز ەركىمەن ارەكەت ەتۋى، ال مەدياتور تاراپىنان – تاۋەلسىزدىك، بەيتاراپتىق جانە قۇپيالىلىق. ءبىزدىڭ ءىس-شاراعا ءارتۇرلى ادامدار قاتىستى: قوعامدىق ۇيىمداردىڭ، قالا باسشىلىعىنىڭ، دەنساۋلىق ساقتاۋ، ءبىلىم بەرۋ، كوممەرتسيالىق قۇرىلىمداردىڭ وكىلدەرى. الايدا، ەڭ باستىسى، ءبىز مۇندا جاستاردى شاقىردىق. بۇل جەردە جاستار وتە ماڭىزدى ءارى پايدالى اقپارات الدى دەپ ويلايمىن. ءبىز سپيكەرلەردەن دە سۇرادىق، ولاردىڭ بارلىعى پراكتيكتەر، سوندىقتان ولاردىڭ ارقايسىسى ەلىمىزدەگى مەدياتسيانىڭ بولاشاعى مەن دامۋى تۋرالى ءوز ۇسىنىستارىن ايتادى»، - دەپ تۇيىندەدى روزا بەكىشەۆا.
