ماڭعىستاۋ وبلىسىندا تاعى ءبىر اۋىلدىڭ الكوگولدەن باس تارتۋى مۇمكىن ەكەنى ايتىلدى، دەپ حابارلايدى "ادىرنا" ۇلتتىق پورتالى.
Lada.kz دەرەگىنشە، تۇپقاراعان اۋدانىنىڭ اكىمى راحات ەلتىزاروۆ تاۋشىق اۋىلىنىڭ تۇرعىندارىنا الكوگولدەن باس تارتۋدى ۇسىنعان.
اتالمىش اۋىلدا 3 مىڭنان استام ادام تۇرادى. مۇندا 1 امبۋلاتوريا، 2 جەكە مەديتسينالىق ورتالىق، 3 بالاباقشا جانە 1 مەكتەپ جۇمىس ىستەيدى ەكەن. اكىمنىڭ ۇندەۋىندە:
«قۇرمەتتى ارداگەرلەر! ىشكى مادەنيەتتى دامىتۋ جانە كورشىلەس اۋدانداردا وتكىزىلگەن جاقسى ۇردىسكە سۇيەنە وتىرىپ، تاۋشىق اۋىلىن "الكوگولسىز اۋىل" رەتىندە كوپكە ۇلگى ەتۋدى جانە الكوگولدىك ىشىمدىكتەردەن باس تارتۋ جۇمىسىن جۇرگىزۋدى ۇسىنامىن»، – دەلىنگەن.
اكىمنىڭ "الكوگولسىز اۋىل" ۇسىنىسىنا قارسىلىق بىلدىرگەندەر بولماعان كورىنەدى.
ايتا كەتەيىك، ماڭعىستاۋدا بىلتىر وزگە ءبىر اۋىل تولىعىمەن الكوگولدەن باس تارتقان. ماڭعىستاۋ وبلىسىنىڭ مۇنايلى اۋدانىنداعى باياندى اۋىلىندا تۇرعىندار مەن كاسىپكەرلەر ءوزارا كەلىسىپ، ىشىمدىك ساتۋدان باس تارتتى. بۇل شەشىمنىڭ نەگىزگى ماقساتى — قىلمىستاردى ازايتۋ جانە اۋىلدى ۇلگىلى ەلدى مەكەنگە اينالدىرۋ. اۋىل تۇرعىندارىنا ىشىمدىكتى ساتپاۋ تۋرالى مەموراندۋمعا اۋدان اكىمدىگى مەن پوليتسيا قول قويىپ، اۋىلداعى بارلىق دۇكەندەردە الكوگول ساتىلىمى توقتاتىلدى.
سونداي-اق، سولتۇستىك قازاقستان وبلىسىنىڭ تەڭدىك اۋىلىندا دا 20 جىلدان بەرى الكوگول ساتىلمايدى. بۇل باستامانى اۋىل اقساقالدارى كوتەرگەن، ال بۇگىندە جەرگىلىكتى تۇرعىندار اراسىندا ىشىمدىككە سۇرانىس جوق. اۋىلدا قىلمىس دەڭگەيى دە وتە تومەن، ال تۇرعىندار بوس ۋاقىتىندا وتباسىلىق شارۋالارمەن اينالىسىپ، دەنە شىنىقتىرۋمەن شۇعىلداناتىنى تۋرالى جاريالانعان بولاتىن.
