قازاقستاننىڭ ەنەرگەتيكا مينيسترلىگى باتىس قازاقستاندا اۆتوگاز تاپشىلىعى سەزىلگەنىن راستادى، دەپ حابارلايدى "ادىرنا" ۇلتتىق پورتالى قازتاگ اگەنتتىگىنە سىلتەپ.
مينيسترلىكتىڭ مالىمەتىنشە، قازان ايىندا باتىس قازاقستان وبلىسىنا «جايىقمۇناي» جشس رەسۋرستارىنان 3510 توننا سۇيىتىلعان مۇناي گازى بولىنگەن. ونىڭ 2689 تونناسى نەمەسە 77%-ى جەتكىزىلگەن. اتىراۋ مۇناي وڭدەۋ زاۋىتىنداعى جوندەۋ جۇمىستارىنا بايلانىستى «جايىقمۇناي» كومپانياسى بۇل گازدى تەك باتىس قازاقستانعا عانا ەمەس، اتىراۋ وبلىسىنا دا جەتكىزىپ وتىر. ەلدەگى اۆتوگازعا دەگەن ناقتى قاجەتتىلىك اي سايىن 164 مىڭ توننانى قۇرايدى، بىراق ءوندىرىس كولەمى بۇل سۇرانىستى تولىق قاناعاتتاندىرا الماي وتىر.
تمد ەلدەرى قولداناتىن كولىكتەر سانىنىڭ كوبەيۋى گاز سۇرانىسىن ارتتىرىپ وتىر. 2023 جىلى گازبەن جۇرەتىن اۆتوكولىكتەر سانى 582 مىڭعا جەتىپ، 2022 جىلمەن سالىستىرعاندا 14%-عا وسكەن. سونىمەن قاتار، تمد-نىڭ وزىندىك قۇنىنان تومەن باعاسى دا تاپشىلىققا اسەر ەتۋدە، زاۋىتتار ءار توننادان 20-30 مىڭ تەڭگە شىعىن كورۋدە.
قازاقستاننان اۆتوگازدى اۆتوكولىك جانە تەمىرجول كولىگى ارقىلى ەكسپورتتاۋعا 2024 جىلدىڭ 14 قاراشاسىنا دەيىن تىيىم سالىنعان. مينيسترلىك بۇل شەكتەۋدى الداعى 6 ايعا ۇزارتۋدى جوسپارلاپ وتىر.
Telegram-داعى "پرەزيدەنتكە حات" ارناسى باتىس قازاقستان وبلىسىنداعى اۆتوگاز تاپشىلىعىن، تۇرعىنداردىڭ بىرنەشە ساعات بويى كەزەكتە تۇرعانىن حابارلادى.
بۇدان الدىندا قازاقستاندا اۆتوگاز باعاسىنىڭ بىرتىندەپ بەنزين باعاسىنا تەڭەستىرىلەتىنى ايتىلعان. ەلدەگى قاڭتار وقيعاسى 2022 جىلى ماڭعىستاۋدا ءبىر ايدىڭ ىشىندە اۆتوگاز باعاسىنىڭ دۇركىندەپ قىمباتتاۋىنا نارازىلىقتان تۋىنداعان ەدى. كەيىن باسقا دا ايماقتا وسى نارازىلىقتى قولداۋدان تۇتانعان قاقتىعىس كەزىندە كەم دەگەندە 238 ادام قازا تاپقان.
