تاۋەلسىزدىگىمىزدىڭ تىرەگى - قازاقستان رەسپۋبليكاسى كونستيتۋتسياسى كۇنى قۇتتى بولسىن! وسىناۋ ايتۋلى كۇن قارساڭىندا مەملەكەتتىگىمىزدىڭ باس قۇجاتى اتا زاڭ قابىلدانعان كۇندى قالاي اتاپ وتكەن ءجون دەگەن ساۋال تۋراسىندا وي بولىسسەك.
حالىق بۇل مەرەكەنى «قوسىمشا دەمالىس بەرەتىن كۇن» نەمەسە «جۇمىستان سىياقى الاتىن كۇن»،- دەپ ەسەپتەمەس ءۇشىن نە ىستەۋىمىز قاجەت؟
مەن بىرەر جىل نورۆەگيادا تۇرعانىم بار ەدى. سول كەزدە نورۆەگتەردىڭ كونستيتۋتسيا كۇنىن قالاي تويلايتىنىنا كۋا بولدىم. بۇل ەلدە كونستيتۋتسيا كۇنى شىن مانىندە بۇكىلحالىقتىق مەرەكەگە اينالعان. 17-مامىردى ەڭبەكتەگەن نارەستەدەن ەڭكەيگەن قارتقا دەيىن اسىعا كۇتىپ، شىن نيەتىمەن تويلايتىنى سىرت كوزگە بىردەن كورىنەدى.
بۇل كۇن - نورۆەگتەر ءۇشىن مەرەكە تاڭنان باستالادى. اۋلالارىنا، بالكوندارىنا وزدەرىنىڭ تۋلارىن ءىلىپ، تۋعان-تۋىس، اعايىندارىمەن الاڭعا شىعادى. ءجاي عانا شىقپايدى. وزدەرىنىڭ ۇلتتىق كيىمدەرىن كيىپ، وزدەرىنىڭ نورۆەگ ەكەنىنە، تاۋەلسىز ەل ەكەنىنە ماساتتانىپ شىعادى. وسى ەلدى مەكەندەيتىن وزگە ۇلت وكىلدەرى دە نورۆەگ ۇلتتىق كيىمدەرىن كيىپ، بۇل ۇردىستەن قالىس قالمايدى. بۇل كۇنى نورۆەگيانىڭ ءار قالاسىنىڭ ۇلكەن الاڭدارىندا ءتۇرلى پارادتار بولادى. بالالار پارادى، اسكەريلەر پارادى دەگەندەي تۇرلەنىپ كەتە بەرەدى. جىل ون ەكى اي وسى ەلدە بولعان ادام كونستيتۋتسيا كۇنىنىڭ نورۆەگتەر ءۇشىن ەڭ ايتۋلى كۇن ەكەنىن تويلاۋ ماسشتابىنا قاراپ اڭعارعان بولار ەدى. ۇرپاقتار ساباقتاستىعىن دا، ناعىز «رۋحاني جاڭعىرۋدى» دا ءداپ سول كۇنى نورۆەگيادان كورەسىز.
بۇل مەرەكەنىڭ ءبىزدىڭ ەلدە دە ءدال وسىلاي ەش جاساندىلىقسىز تويلانعانىن قالار ەدىم. ەلىمىزدەگى ءار ازامات ءوزىنىڭ ۇلتىنا، ناسىلىنە، ءدىني نانىم-سەنىمىنە قاراماي، مەملەكەتىمىزگە، اتا زاڭىمىزعا دەگەن قۇرمەتىن شىنايى كورسەتىپ، مەرەكەنى بار نيەتىمەن اتاپ وتكەنىن قالايمىن. وسىنداي مەرەكەگە كوزى قانىپ وسكەن جاس ۇرپاق كەلەشەكتە ءوز ەلىنىڭ پاتريوتى بولادى ەمەس پە؟ «تاربيە تال بەسىكتەن»،- دەپ دانا حالقىمىز تەگىن ايتقان جوق. ءبىز جاس بالانىڭ سانا سەزىمىنە كىشكەنتاي كەزىندە وسىناۋ ساۋلەنى دۇرىس قۇيا بىلسەك، ول ەرتەڭ ەرجەتكەن كەزدە ءوزى-اق بۇل مەرەكەنى قالاي تويلاۋ كەرەك ەكەنىن ءبىلىپ تۇرار ەدى.
سوندىقتان دا مەنىڭشە بارشامىز اتا زاڭىمىز قابىلدانعان كۇندى وتباسىمىزدا اتاپ ءوتۋدى داستۇرگە اينالدىرىپ، بالالارىمىزعا بۇگىن قانداي كەرەمەت مەرەكە ەكەنىن ءتۇسىندىرىپ، كوك بايراعىمىزدى كوتەرىپ، وتانىمىزعا دەگەن قۇرمەتىمىزدى كورسەتكەنىمىز ءجون دەپ ويلايمىن. ۋاقىت وتە بۇل تاماشا داستۇرگە اينالىپ كەتەرى ءسوزسىز.
بيبيگۇل جەكسەنباي، استانا تەلەكانالىنىڭ باسشىسى
"ادىرنا" ۇلتتىق پورتالى
