بۇقار جىراۋ اۋدانىندا بودەنە وسىرەتىن قۇس فەرماسى مەن ىرىمشىك زاۋىتى ىسكە قوسىلدى. ەكى كاسىپورىن دا مەملەكەتتىك گرانتتاردىڭ ارقاسىندا اشىلدى.
دوسكەي كەنتىنىڭ تۇرعىنى دانيار تاتىعۇلوۆ 34 جاستا. ول كوپبالالى وتباسىنىڭ وتاعاسى. 2024 جىلى "باستاۋ بيزنەس" باعدارلاماسى بويىنشا وقۋدان ءوتىپ، "2024–2029 جىلدارعا ارنالعان ەڭبەك نارىعىن دامىتۋ تۇجىرىمداماسى" شەڭبەرىندە مەملەكەتتىك گرانت الدى.
مارينادتالعان جانە ىستالعان بودەنە ەتىن وندىرەتىن كاسىپورىن اشۋ ءۇشىن ول 1 476 800 تەڭگە الدى.
ەكى مىڭ جۇمىرتقاعا ارنالعان ينكۋباتور، ۆاكۋمدىق تىعىزداعىش، المالى-سالمالى ماشينانى، ەت ىستايتىن پەش جانە مۇزداتقىش ساتىپ الدى.
قازىر كاسىپكەر بودەنە ءوسىرىپ جاتىر.
ۇشتوبە اۋىلىندا ىرىمشىك زاۋىتى ىسكە قوسىلدى. ونى ءۇش بالانىڭ اناسى اسەمگۇل ەلۋباەۆا اشتى. ول دا "باستاۋ بيزنەس" باعدارلاماسى بويىنشا وقۋدان ءوتىپ، گرانت الدى. بەرىلگەن ءبىر جارىم ميلليون تەڭگەگە 30 ليترلىك ىرىمشىك زاۋىتىن ساتىپ الدى.
"گرانتتار حالىقتىڭ الەۋمەتتىك وسال توپتارىنداعى ادامدارعا: كوپ بالالى وتباسىلاردىڭ مۇشەلەرىنە، مۇگەدەكتەرگە، مۇگەدەك بالالاردىڭ اتا-انالارىنا، ااك الۋشىلارعا ءبولىندى. مەملەكەتتىك قاراجاتقا ولار تىگىن كاسىپورنىن، كونديتەرلىك تسەح، جارتىلاي فابريكاتتار ءوندىرىسىن، قىزمەت كورسەتۋ جانە ءبىلىم بەرۋ سالاسىنداعى ستارتاپتاردى ىسكە قوستى، – دەپ حابارلادى قاراعاندى وبلىسى بويىنشا ەڭبەك ۇتقىرلىعى ورتالىعىنىڭ ءباسپاسوز قىزمەتى. – 2024 جىلى 183 گرانت بەرۋگە 270 ميلليون تەڭگەدەن استام قاراجات ءبولىندى".
