بۇگىن استانا قالاسىنىڭ بوتانيكالىق باعىندا ساعات 09:00-دە «Pink Run» الەۋمەتتىك-سپورتتىق شاراسى ءوتتى. ەسىل اۋداندىق اكىمدىگىنىڭ ۇيىمداستىرۋىمەن وتكەن ءىس-شارا راكپەن كۇرەس ايىندا ۇيىمداستىرىلىپ، ءسۇت بەزى قاتەرلى ىسىگىنىڭ الدىن الۋ مەن ەرتە انىقتاۋدىڭ ماڭىزدىلىعىن ناسيحاتتاۋعا باعىتتالدى.
شاراعا قازاقستاننىڭ بارلىق وڭىرلەرىنەن كەلگەن ونكولوگ دارىگەرلەر، پاتسيەنتتەر جانە ماسەلەنىڭ وزەكتىلىگىن تۇسىنەتىن قاراپايىم ازاماتتار قاتىستى. ۇيىمداستىرۋشىلاردىڭ مالىمدەۋىنشە، بۇل جوبا قوعامنىڭ نازارىن ءسۇت بەزى قاتەرلى ىسىگىنە قارسى كۇرەسكە اۋدارىپ، ايەلدەرگە تۇراقتى مەديتسينالىق تەكسەرۋلەردەن ءوتۋ قاجەتتىلىگىن ەسكە سالۋعا باعىتتالعان.
مارافوندا 350-دەن استام قاتىسۋشى ءتۇرلى دەڭگەيدەگى قاشىقتىقتار بويىنشا جارىسقا ءتۇستى — 1,3 كم جانە 3,9 كم. جۇگىرۋگە بارلىق جاستاعى جانە كەز كەلگەن دايىندىق دەڭگەيىندەگى ادامدار قاتىستى. قاتىسۋشىلارعا شامامەن 60 باعالى سىيلىقتار مەن مەدالدار تابىستالدى.
«ەرتە دياگنوستيكا ءسۇت بەزى قاتەرلى ىسىگىن ەمدەۋدىڭ تابىستى بولۋىنا نەگىز بولا الادى. بۇل اۋرۋ الەمدەگى ايەلدەر اراسىندا ەڭ ءجيى كەزدەسەتىن ونكولوگيالىق دەرت بولىپ تابىلادى. قازاقستاندا جىل سايىن شامامەن 5000 ايەل وسى اۋرۋعا شالدىعادى، ال 1200-گە جۋىعى وسى دەرتتىڭ سالدارىنان كوز جۇمادى. ەگەر اۋرۋ ەرتە ساتىسىندا انىقتالسا، ونى ەمدەۋ مۇمكىندىگى 90%-عا دەيىن ارتادى. سوندىقتان، «Pink Run» سىندى شارالار تۇراقتى تەكسەرۋلەردىڭ ماڭىزدىلىعى تۋرالى حابار تاراتۋدى جانە قوعامدى وسى ماسەلەنى شەشۋگە جۇمىلدىرۋدى ماقسات ەتەدى»، — دەپ اتاپ ءوتتى ونكولوگ-ماممولوگ دارىگەر، «ونكولوگ-ماممولوگتار قوعامى» قوعامدىق بىرلەستىگىنىڭ ءتورايىمى دينارا ەرمەكقىزى سامەنوۆا.
