وزبەكستان بيلىگى ەلدىڭ ەشقانداي اسكەري قۇرىلىمدارعا قوسىلمايتىنىن جانە ەاەو-دا باقىلاۋشى مەملەكەت مارتەبەسىندە قالاتىنىن مالىمدەدى، دەپ حابارلايدى "ادىرنا" ۇلتتىق پورتالى.
فەرعانا اگەنتتىگىنىڭ مالىمەتىنشە، تاشكەنتتە وتكەن حالىقارالىق سەرىكتەستىك باستامالارى اپتالىعىنىڭ اشىلۋىندا وزبەكستاننىڭ ولي ماجليس زاڭ شىعارۋ پالاتاسىنىڭ ءبىرىنشى ورىنباسارى اكمال سايدوۆ مالىمدەدى.
«كونستيتۋتسيانىڭ ءبىرىنشى بابىندا وزبەكستان – ەگەمەن مەملەكەت ەكەنى ايتىلعان. ەگەر قانداي دا ءبىر اسكەري قورعانىس قۇرىلىمدارىنا جانە ۇيىمدارعا قوسىلۋ تۋرالى ءسوز بولسا، ءبىز بۇعان جول بەرمەيمىز. ءبىز ەشقاشان ءوز جىگىتتەرىمىزدى شەتەلگە قانداي دا ءبىر اسكەري ميسسيالاردى، ونىڭ ىشىندە بىتىمگەرشىلىك ميسسيالارىن ورىنداۋ ءۇشىن جىبەرمەيمىز. ءبىزدىڭ جەرىمىزدە ەشقانداي شەتەلدىك اسكەري بازالار بولمايدى»، – دەدى ۆيتسە-سپيكەر.
ودان بولەك، سايدوۆ وزبەكستانعا ەاەو-دا باقىلاۋشى مەملەكەت مارتەبەسى ءتيىمدى ەكەنىن اتاپ ءوتتى.
«مەن وزبەكستاننىڭ ەاەو-عا كىرۋ مۇمكىندىگىن زەرتتەۋ بويىنشا پارلامەنتتىك كوميسسيانىڭ جەتەكشىسىمىن. ءبىز وسى ۇيىمنىڭ مىڭنان استام ءارتۇرلى قۇجاتىن مۇقيات زەرتتەدىك جانە قازىرگى ۋاقىتتا وزبەكستاننىڭ مۇددەسىنە باقىلاۋشى مارتەبەسىن ساقتاۋ سايكەس كەلەدى دەگەن قورىتىندىعا كەلدىك.
مىسالى، قازاق ارىپتەستەرىمىزدەن ەاەو-عا كىرۋدەن ولاردىڭ ەلدەرى از عانا پايدا كورگەنىن ەستىدىك. بىراق بۇل اقپاراتقا كەپىلدىك بەرە المايمىن. وزبەكستاننىڭ جاڭا كونستيتۋتسيادا بەكىتىلگەن سىرتقى ساياساتتىڭ نەگىزگى قاعيدالارى بار، ءبىز سولارعا سۇيەنەمىز»، – دەپ ءتۇسىندىردى سايدوۆ.
