Joǵarǵy sottyń burynǵy tóraǵasy, senator Jaqyp Asanov kisi qolynan qaza tapqan Sherzat Bolattyń ólimine qatysty pikir bildirdi, dep habarlaıdy "Adyrna" ulttyq portaly.
Áleýmettik jelide senatordyń "Hýtor" bandasynyń basshysymen týystyq qatynasy bar degen aqparat taraǵan. Jaqyp Asanov “Hýtor” bandasynyń basshysy degen kúdikke ilingen Hasan Qasymbekovke týystyq qatynasy bary týraly aqparatty joqqa shyǵardy.
“Bul aqparat týraly birinshi kúni-aq estidim. Men buǵan qatysty pikir bildirýden bas tarttym. Óıtkeni munyń bári ótirik, jalǵan. Ony tanymaımyn, bilmeımin, kórgen emespin. Qazir áleýmettik jelide jalǵan aqparat kóp. Onyń bárine sene berýge bolmaıdy. Biraq kim biledi? Bireý meniń atymdy shyǵaraıyn degen shyǵar. Másele tek mende emes. Jalpy ótirik nárse kóp. Onyń barlyǵy tergeý amaldaryn júrgizýge kedergi jasaıdy”, – deıdi senator.
Jaqyp Asanov Sherzat Bolattyń aıýandyqpen óltirilýine baılanysty pikir bildirdi.
“Talǵardaǵy óte qıyn jaǵdaı. Qııanattyń qııanaty. Jap-jas mekteptegi balany eresek birneshe erkekter jabylyp uryp, áke-sheshesiniń qolyn baılap, kózinshe óltirgeni óte aýyr. Qazanyń jeńili joq deıdi. Dese de bul aýyr jaǵdaı”, – deıdi Jaqyp Asanov.
Senator 16 jastaǵy Sherzat Bolattyń ólimine qatysty sottyń ashyq rejımde, onlaın ótýine qatysty pikir bildirdi.
“Prokýratýra sottyń ashyq ótýin suraımyz dep aıtyp qaldy. Biraq ony sýdıa sheshedi. Ol týraly meniń aıtqanym orynsyz bolady. Óıtkeni ony sol is boıynsha tóraǵalyq etetin sýdıa sheshedi”, – dedi Jaqyp Asanov.
