بانگلادەشتىڭ بۇرىنعى پرەمەر-ءمينيسترى شەيح حاسينا ءولىم جازاسىنا كەسىلدى. تەرگەۋ مالىمەتىنشە، ول «اۆامي ليگاسى» ۇكىمەتىنىڭ قۇلاۋىنا اكەلگەن ستۋدەنتتىك كوتەرىلىستى كۇشتەپ باسۋعا بۇيرىق بەرگەن، دەپ حابارلايدى "ادىرنا".
سوت بىرنەشە ايعا سوزىلعان تىڭداۋلاردىڭ ناتيجەسىندە ەلدىڭ بۇرىنعى پرەمەر-ءمينيسترىن 3 باپ بويىنشا ايىپتى دەپ تاپتى.
ءۇش سۋديادان قۇرالعان تريبۋنالدىڭ توراعاسى موحد گولام مورتۋزا مادجۋمدەر حاسينانىڭ ەكى سەرىكتەسى – بۇرىنعى ىشكى ىستەر ءمينيسترى اسادۋززامان حان كامال مەن بۇرىنعى پوليتسيا باسشىسى چوۋدحۋري ابدۋللا ءال-مامۋنعا قاتىستى دا شەشىم شىعاردى. سوت ولاردىڭ ۇشەۋى ەل بويىنشا نارازىلىق بىلدىرۋشىلەرگە قارسى قىلمىستىق ارەكەتتەردى ۇيىمداستىرۋ ءۇشىن الدىن الا كەلىسىم جاساعانىن مالىمدەدى. دەگەنمەن، بۇرىنعى پوليتسيا باسشىسى اقتالىپ شىقتى.
ۇكىم جاريالانار الدىندا ەل اۋماعىندا قاۋىپسىزدىك شارالارى كۇشەيتىلگەنى حابارلاندى.
ەسكە سالا كەتەيىك، شەيح حاسينا 2024 جىلدىڭ 5 تامىزىندا وتستاۆكاعا كەتىپ، بانگلادەشتەن قاشىپ كەتكەن.
بانگلادەشتەگى جاپپاي نارازىلىق اكتسيالارى 2024 جىلعى شىلدەدە باستالىپ، كوپ ۇزاماي كۇش قۇرىلىمدارىمەن قاندى قاقتىعىستارعا ۇلاستى. بۇل وقيعالار بارىسىندا جۇزدەگەن ادام، سونىڭ ىشىندە بالالار قازا تاپتى.
نارازىلىقتاردى اياۋسىز باسىپ-جانشۋ ساتتەرى تۇسىرىلگەن كادرلار الەۋمەتتىك جەلىلەردە كەڭ تارالىپ، ەل تۇرعىندارىنىڭ اشۋ-ىزاسىن تۋعىزدى.
بانگلادەشتەگى دەمونستراتسيالاردى ستۋدەنتتەر ۇيىمداستىردى: ولار 1971 جىلى پاكىستاننان تاۋەلسىزدىك ءۇشىن سوعىسقان ارداگەرلەردىڭ تۋىستارىنا مەملەكەتتىك سەكتورداعى جۇمىس ورىندارىنىڭ ۇشتەن ءبىرى رەزەرۆتەلەتىن جۇيەنى وزگەرتۋ تالاپ ەتتى.
2018 جىلى شەيح حاسينا ۇكىمەتى بۇل كۆوتالاردى جويعان ەدى، الايدا 2024 جىلدىڭ ماۋسىمىندا تومەنگى سوت ولاردى قايتا قالپىنا كەلتىردى. ستۋدەنتتەر قولدانىستاعى ءتارتىپتى كەمسىتۋشىلىك دەپ اتاپ، جۇمىسقا قابىلداۋ ءاربىر ۇمىتكەردىڭ كاسىبي بىلىكتىلىگىنە قاراي جۇرگىزىلۋى كەرەك ەكەنىن تالاپ ەتتى.
پوليتسيامەن قاقتىعىستار اياسىندا بانگلادەش بيلىگى ەل بويىنشا قاۋىپتىڭ جوعارى دەڭگەيىن ەنگىزدى. ينتەرنەت ەلدىڭ پوچتي بارلىق وڭىرلەرىندە ءوشىرىلدى، كەي ايماقتاردا تەلەفون جەلىلەرى دە جۇمىس ىستەمەدى. استانادا كومەندانتتىق ساعات ەنگىزىلدى. بيلىك نارازىلاردى مەملەكەتتىك BTV تەلەكومپانياسىنىڭ عيماراتىن ورتەگەنى ءۇشىن ايىپتادى. پوليتسيا دەمونسترانتتارعا قاتىستى كوز جاس اعىزاتىن گاز بەن رەزەڭكە وق قولداندى.
