فۋتبولدان قازاقستان قۇراماسىنىڭ باس باپكەرى ستانيسلاۆ چەرچەسوۆ قازاق تىلىندە سۇراق قويعان ءجۋرناليستى مازاق قىلدى، دەپ حابارلايدى «ادىرنا» ءتىلشىسى.
كەلەڭسىز جاعداي سلوۆەنيامەن وتكەن ماچتان كەيىنگى ءباسپاسوز كونفەرەنتسياسىندا بولدى. باس باپكەر وزىنە قازاقشا سۇراق قويعان ءتىلشىنىڭ سۇراعىنا كەلەمەجدەپ جاۋاپ قاتتى.
«سەن قازىر فرانتسۋز تىلىندە سويلەپ تۇرسىڭ با؟»–دەدى ول ءجۋرناليستىڭ ءسوزىن ءبولىپ. كەيىن باسىن يزەپ، سۇراعىن جالعاستىرۋعا بولاتىنىن اڭعارتتى.
ەسكە سالايىق، بۇعان دەيىن ستانيسلاۆ چەرچەسوۆ استانادا وتكەن ءباسپاسوز ماجىلىسىندە قازاقشا سۇراق قويىلعانىنا شاعىمدانعان ەدى.
«نەگە ورىسشا قويمايسىز؟ مەن قازىر سىزگە ءوز انا ءتىلىم وسەتين تىلىندە جاۋاپ بەرسەم نە بولادى؟ بىراق ول كەزدە ەشكىم تۇسىنبەيدى. وسىنىڭ الدىندا قازاقشا ساۋالىڭىزدى فەدەراتسيا پرەزيدەنتى اۋدارىپ بەردى، ەندى ول كىسىنى قايتا-قايتا اۋرەلەمەيمىن عوي»،—دەپ نارازىلىق ءبىلدىردى باس باپكەر.
كەيىن ءتىل بەلسەندىلەرى چەرچەسوۆتىڭ قازاقشا ۇيرەنىپ، ءتىل سىندىرىپ جاتقانى جايىندا مالىمەت تاراتقان.
