ۇلىتاۋ وبلىسىندا جاڭا سپورت بازاسىنىڭ قۇرىلىسى باستالدى

135
Adyrna.kz Telegram

نىسان قۇرىلىسى ەسكەك ەسۋشى سپورتشىلاردى قولداۋ باعىتىندا قولعا الىندى. ۇلىتاۋ وبلىسىنىڭ اكىمى بەرىك ابدىعاليۇلى سالىنىپ بولعان سوڭ بازانىڭ قىس مەزگىلىندە شاڭعى سپورتىن دامىتۋعا دا قولدانىلاتىنىن جەتكىزدى.

«سپورت بازاسىنىڭ زالدارىن بولۋدە شاڭعى سپورتى سەكتسيالارىن دامىتۋ تۇسىن ەسكەرىڭىزدەر. نىسان ءبىر مەزگىل عانا ەمەس، قىستا دا جۇمىس ىستەۋى قاجەت»-دەدى ءوڭىر باسشىسى ءوز سوزىندە.

ايتا كەتەيىك، سپورتتىڭ بۇل تۇرىنەن جەرلەستەرىمىز بيىك بەلەستەردى باعىندىرۋدا. ماۋسىمنىڭ 14-16 ارالىعىندا تايلاندتا ءوتىپ جاتقان ازيا چەمپيوناتىندا جەرلەستەرىمىز ماليكا تۋرسىن، ۆيكتوريا فالولەەۆا كۇمىس جانە قولا مەدالدارىنا قول جەتكىزدى.

نىسانعا كەلەر بولساق، كورپۋس قوس قاباتتى بولادى. ءبىرىنشى قاباتىندا ويىن زالى، كۇزەت ءبولىمى، مەديتسينالىق پۋنكت، قويما، جىلۋ تورابى، جاتتىعۋشىلار مەن جاتتىقتىرۋشىلاردىڭ جۋىنۋ-كينۋ بولمەسى، شاڭعىشىلاردىڭ كيىم اۋىستىرۋعا ارنالعان ورىندارى جوسپارلانعان.

ەكىنشى قاباتتا جاتتىعۋ زالى، قابىلداۋ بولمەسى، ءماجىلىس زالى، ەسكەك ەسۋ سپورت تۇرلەرىنىڭ جاتتىقتىرۋشىلارى زالى، اكىمشىلىك، بۋحگالتەريا، جۋىنۋ-كيىنۋ بولمەلەرى بولماق.

نىسانعا بولىنگەن اۋماق - 4 جارىم گەكتاردان استام. قولدانىسقا بەرىلۋ ۋاقىتى 2025 جىلدىڭ سوڭىنا جوسپارلانعان.

پىكىرلەر