الماتى وبلىسى، تالعار قالاسىندا ءبىر توپ بۇزاقىنىڭ قولىنان قازا تاپقان 16 جاستاعى ءجاسوسپىرىمنىڭ ءۇيى تولىعىمەن ورتەندى، دەپ حابارلايدى “ادىرنا” ۇلتتىق پورتالى.
مارقۇمنىڭ ءۇيى سەنبىگە قاراعان ءتۇنى ورتەنگەن. تجم مالىمەتىنشە، زارداپ شەككەندەردىڭ بار-جوعى ناقتىلانۋدا.
الماتى وبلىسىنىڭ پوليتسيا دەپارتامەنتى ءورت فاكتىسىن راستادى.
"پوليتسيا بوتەننىڭ مۇلكىن قاساقانا جويۋ دەرەگى بويىنشا قىلمىستىق ءىس قوزعادى", – دەلىنگەن پد حابارلاماسىندا.
تەرگەۋ اياسىندا كۋاگەرلەردەن جاۋاپ الىنعان. سونداي-اق، بەينەباقىلاۋ كامەرالارىنىڭ جازبالارى زەرتتەلىپ جاتقانى ايتىلدى.
"قازىرگى ۋاقىتتا وقيعانىڭ بارلىق ءمان-جايى مەن وقيعاعا سەبەپ بولۋى مۇمكىن سەبەپتەر انىقتالىپ جاتىر”، – دەلىنگەن حابارلامادا.
باس پروكۋراتۋرانىڭ مالىمەتىنشە، قىلمىستىق iس قازاقستان رەسپۋبليكاسى باس پروكۋرورىنىڭ باقىلاۋىنا الىندى.
ايتا كەتەيىك، تالعاردا سىرا ءۇشىن توبەلەسكەندەردىڭ قولىنان قازا تاپقان 16 جاستاعى ءجاسوسپىرىم شەرزات بولاتتىڭ ءولىمى قوعامدىق رەزونانس تۋدىردى.
