تۇركىمەنستانعا رەسمي ساپارمەن بارعان پرەزيدەنت قاسىم-جومارت توقاەۆ پەن حالك ماسلاحاتىنىڭ توراعاسى گۋربانگۋلى بەردىمۇحامەدوۆ اشحابادتاعى اباي ەسكەرتكىشىن سالتاناتتى تۇردە اشتى، دەپ حابارلايدى "ادىرنا" ۇلتتىق پورتالى.
قاسىم-جومارت توقاەۆ گۋربانگۋلى بەردىمۇحامەدوۆ پەن تۇرىكمەن حالقىنا ماقتىمقۇلى پىراعىنىڭ 300 جىلدىق مەرەيتويىنا وراي ارنايى شىعارىلعان مەدالمەن ماراپاتتاعانى ءۇشىن العىس ايتتى. سونىمەن قاتار مۇنى ەكى ەل اراسىنداعى ءوزارا سىي-قۇرمەت پەن دوستىقتىڭ بەلگىسى رەتىندە قابىلدايتىنىن جەتكىزدى.
"اباي – الەمدىك اۋقىمداعى الىپ تۇلعا. ونىڭ شىعارمالارى بۇكىل ادامزاتتىڭ اسىل مۇراسىنا اينالدى. جەر جۇزىندەگى كوپتەگەن قالادا حاكىم ابايدىڭ ەسكەرتكىشى بار. ۇلى اقىن سانالى عۇمىرىن اعارتۋ ىسىنە ارنادى. اباي "تالاپ قىل ارتىق بىلۋگە" دەپ، ونەر-ءبىلىم فيلوسوفياسىن كەڭىنەن ناسيحاتتادى. ول تەڭدەسسىز تۋىندىلارى ارقىلى مىزعىماس قۇندىلىقتاردى دارىپتەدى. جۇرتتى وتانشىلدىققا، بىلىمپازدىققا، ەڭبەكقورلىققا باۋلىدى. جاقسىلىق پەن پاراساتتىلىققا ۇندەدى. اشحابادتا اباي ەسكەرتكىشىنىڭ اشىلۋى – باۋىرلاستىعىمىزدى نىعايتا تۇسەتىن بىرەگەي باستاما", – دەدى قاسىم-جومارت توقاەۆ.
پرەزيدەنت بيىل استانادا تۇرىكمەن حالقىنىڭ ۇلى ويشىلى ماقتىمقۇلى پىراعىنىڭ ەسكەرتكىشى اشىلعانىن ەسكە سالدى.
"شىن مانىندە، اباي مەن ماقتىمقۇلى ەڭبەكتەرى – تۇركى دۇنيەسىنىڭ قۇندى قازىناسى. ونى ساقتاپ، كەيىنگى ۇرپاققا قالدىرۋ – بارشامىزعا ورتاق مىندەت. ۇلى اقىندارىمىزدىڭ پوەزياسىندا ءوزارا ساباقتاستىق مىسالدارى كوپ. ءبىز – ءتۇبى ءبىر، تاريحى ورتاق، ءتىلى مەن مادەنيەتى ۇقساس حالىقتارمىز. وسى باۋىرلاستىق ەلدەرىمىزدىڭ قارىم-قاتىناسىنا ارقاۋ بولىپ وتىر. قازىر بۇل بايلانىس ستراتەگيالىق سەرىكتەستىك رۋحىندا دامىپ كەلە جاتىر. تۇرىكمەنستانعا بۇگىنگى رەسمي ساپارىم – سونىڭ ايقىن دالەلى. ابايدىڭ ەسكەرتكىشى قازاق-تۇرىكمەن دوستىعىنىڭ سيمۆولىنا اينالادى دەپ سەنەمىن", – دەدى پرەزيدەنت.
تۇركىمەنستان حالك ماسلاحاتىنىڭ توراعاسى باۋىرلاس حالىقتاردىڭ تاريحي جانە مادەني ومىرىندە جارقىن ءىز قالدىرعان بەلگىلى تۇلعالاردى ناسيحاتتاۋ اسا ماڭىزدى ەكەنىن ايتتى.
"بۇگىن ءبىز استانامىز اشحابادتىڭ تاماشا مۇيىسىندە ورنالاسقان عاجاپ ساياباقتا باۋىرلاس قازاق حالقىنىڭ ۇلى اقىنى، كورنەكتى مادەنيەت جانە ونەر قايراتكەرى اباي قۇنانبايۇلىنىڭ ەسكەرتكىشىن اشۋ راسىمىندە باس قوسىپ وتىرمىز. بارشاڭىزدى وسى سالتاناتتى ساتپەن شىن جۇرەكتەن قۇتتىقتايمىن! تۇرىكمەن جانە قازاق حالىقتارى الەمنىڭ مادەني-رۋحاني قازىناسىنا ۇلكەن ۇلەس قوستى. سوعان سايكەس، بۇل مادەني مۇرانى تىڭعىلىقتى زەرتتەۋ، ونى كەڭىنەن ناسيحاتتاۋ جانە وسى سالاداعى حالىقارالىق ارىپتەستىكتى دامىتۋ اسا ماڭىزدى مىندەت بولىپ سانالادى", – دەدى گۋربانگۋلى بەردىمۇحامەدوۆ.
ءىس-شاراعا تۇركىمەنستاننىڭ زيالى قاۋىم وكىلدەرى جانە قازاقستاننىڭ رەسمي دەلەگاتسيا مۇشەلەرى قاتىستى.
