Túrkimenstanǵa resmı saparmen barǵan Prezıdent Qasym-Jomart Toqaev pen Halk Maslahatynyń tóraǵasy Gýrbangýly Berdimuhamedov Ashhabadtaǵy Abaı eskertkishin saltanatty túrde ashty, dep habarlaıdy "Adyrna" ulttyq portaly.
Qasym-Jomart Toqaev Gýrbangýly Berdimuhamedov pen túrikmen halqyna Maqtymquly Pyraǵynyń 300 jyldyq mereıtoıyna oraı arnaıy shyǵarylǵan medalmen marapattaǵany úshin alǵys aıtty. Sonymen qatar muny eki el arasyndaǵy ózara syı-qurmet pen dostyqtyń belgisi retinde qabyldaıtynyn jetkizdi.
"Abaı – álemdik aýqymdaǵy alyp tulǵa. Onyń shyǵarmalary búkil adamzattyń asyl murasyna aınaldy. Jer júzindegi kóptegen qalada hakim Abaıdyń eskertkishi bar. Uly aqyn sanaly ǵumyryn aǵartý isine arnady. Abaı "Talap qyl artyq bilýge" dep, óner-bilim fılosofııasyn keńinen nasıhattady. Ol teńdessiz týyndylary arqyly myzǵymas qundylyqtardy dáriptedi. Jurtty otanshyldyqqa, bilimpazdyqqa, eńbekqorlyqqa baýlydy. Jaqsylyq pen parasattylyqqa úndedi. Ashhabadta Abaı eskertkishiniń ashylýy – baýyrlastyǵymyzdy nyǵaıta túsetin biregeı bastama", – dedi Qasym-Jomart Toqaev.
Prezıdent bıyl Astanada túrikmen halqynyń uly oıshyly Maqtymquly Pyraǵynyń eskertkishi ashylǵanyn eske saldy.
"Shyn máninde, Abaı men Maqtymquly eńbekteri – túrki dúnıesiniń qundy qazynasy. Ony saqtap, keıingi urpaqqa qaldyrý – barshamyzǵa ortaq mindet. Uly aqyndarymyzdyń poezııasynda ózara sabaqtastyq mysaldary kóp. Biz – túbi bir, tarıhy ortaq, tili men mádenıeti uqsas halyqtarmyz. Osy baýyrlastyq elderimizdiń qarym-qatynasyna arqaý bolyp otyr. Qazir bul baılanys strategııalyq seriktestik rýhynda damyp kele jatyr. Túrikmenstanǵa búgingi resmı saparym – sonyń aıqyn dáleli. Abaıdyń eskertkishi qazaq-túrikmen dostyǵynyń sımvolyna aınalady dep senemin", – dedi Prezıdent.
Túrkimenstan Halk Maslahatynyń tóraǵasy baýyrlas halyqtardyń tarıhı jáne mádenı ómirinde jarqyn iz qaldyrǵan belgili tulǵalardy nasıhattaý asa mańyzdy ekenin aıtty.
"Búgin biz astanamyz Ashhabadtyń tamasha múıisinde ornalasqan ǵajap saıabaqta baýyrlas qazaq halqynyń uly aqyny, kórnekti mádenıet jáne óner qaıratkeri Abaı Qunanbaıulynyń eskertkishin ashý rásiminde bas qosyp otyrmyz. Barshańyzdy osy saltanatty sátpen shyn júrekten quttyqtaımyn! Túrikmen jáne qazaq halyqtary álemniń mádenı-rýhanı qazynasyna úlken úles qosty. Soǵan sáıkes, bul mádenı murany tyńǵylyqty zertteý, ony keńinen nasıhattaý jáne osy saladaǵy halyqaralyq áriptestikti damytý asa mańyzdy mindet bolyp sanalady", – dedi Gýrbangýly Berdimuhamedov.
Is-sharaǵa Túrkimenstannyń zııaly qaýym ókilderi jáne Qazaqstannyń resmı delegaııa músheleri qatysty.
