ماڭعىستاۋ وبلىسىنىڭ پوليتسيا دەپارتامەنتى وڭىردە ازاماتتىق قارۋدى ساتىپ الۋعا رۇقسات بەرۋ كەزىندە زاڭ بۇزۋشىلىقتار تۋرالى پايدا بولعان اقپاراتتى جوققا شىعاردى، دەپ حابارلايدى "ادىرنا" ۇلتتىق پورتالى.
ءبىر كۇن بۇرىن ماڭعىستاۋ وبلىسىنىڭ پروكۋراتۋراسى قاداعالاۋ ورگانىنىڭ ەسەبىن ۋاقتىلى قاراماعانى ءۇشىن تۇپقاراعان اۋداندىق ىشكى ىستەر ءبولىمى باستىعىنىڭ مىندەتىن اتقارۋشىنىڭ تارتىپتىك جاۋاپكەرشىلىككە تارتىلعانىن حابارلادى.
دەپارتامەنتتىڭ مالىمەتىنشە، دەنساۋلىققا قاساقانا جەڭىل زيان كەلتىرگەنى جانە تۇرمىستىق زورلىق-زومبىلىق جاساعانى ءۇشىن اكىمشىلىك جاۋاپكەرشىلىككە تارتىلعان تۇلعالار رۇقساتتاردى العان. اتالعان زاڭبۇزۋشىلىقتاردى جويۋ ماقساتىندا تۇپقاراعان اۋداندىق ىشكى ىستەر بولىمىنە ۇسىنىس ەنگىزىلىپ، زاڭدا بەلگىلەنگەن ءبىر اي مەرزىمدە قارالماعان.
ماڭعىستاۋ وبلىسىنىڭ پوليتسيا دەپارتامەنتى ءبىرىنشى وقيعا بويىنشا 2021 جىلدىڭ جەلتوقسان ايىندا اقتاۋ قالاسىندا وتباسى-تۇرمىستىق قاتىناستار سالاسىنداعى زاڭسىز ارەكەتتەرى ءۇشىن ازامات اكىمشىلىك جاۋاپكەرشىلىككە تارتىلعانىن حابارلادى.
2023 جىلى ەر ادام تۇپقاراعان اۋدانىنا قونىس اۋدارعان. ول قىلمىس جاساعانعا دەيىن قارۋعا رۇقسات العان، مۇنداي قۇقىق بەس جىلعا بەرىلەدى.
«ياعني، پوليتسيا بۇل ازاماتقا قۇقىقبۇزۋشىلىقتان كەيىن ازاماتتىق قارۋدى ساقتاۋعا جانە الىپ جۇرۋگە رۇقسات بەرمەگەن»، - دەپ اتاپ ءوتتى ماڭعىستاۋ وبلىسىنىڭ پوليتسيا دەپارتامەنتىندەگىلەر.
ەكىنشى جاعدايدا، 2023 جىلدىڭ 10 قازانىندا «102» پۋلتىنە وتباسى-تۇرمىستىق قاتىناستار سالاسىنداعى زاڭسىز ارەكەتتەر تۋرالى قوڭىراۋ تۇكەن.
«وسىدان كەيىن ەر ادام دەرەۋ اكىمشىلىك جاۋاپكەرشىلىككە تارتىلدى، سول كۇنى ۋچاسكەلىك ينسپەكتورلار ەكى بىرلىك ازاماتتىق قارۋدى تاركىلەدى»، - دەپ حابارلادى دەپارتامەنتتەگىلەر.
اتالعان قارۋ تۇپقاراعان اۋداندىق ىشكى ىستەر ءبولىمىنىڭ ارنايى كامەراسىندا ساقتاۋلى. ازاماتتىڭ قارۋدى ودان ءارى ساقتاۋعا جانە الۋعا قۇقىعى جوق.
«پوليتسيا ەشقانداي جاعدايدا اكىمشىلىك جانە قىلمىستىق جاۋاپكەرشىلىككە تارتىلعان ازاماتتارعا ازاماتتىق قارۋدى الۋعا جانە ساقتاۋعا رۇقسات بەرمەيدى»، - دەپ حابارلادى وبلىستىق پوليتسيا دەپارتامەنتى.
ايتا كەتەيىك، ماڭعىستاۋدا تۇپقاراعان اۋدانىنىڭ پوليتسيا ءبولىمى باستىعىنىڭ مىندەتىن اتقارۋشى جاۋاپقا تارتىلعانى تۋرالى جازعان ەدىك.
