الەمگە تانىمال ءانشى ديماش قۇدايبەرگەن دىندەر سەزىندە ىزگى نيەت ەلشىسى اتاندى. بۇل تۋرالى استانادا ءوتىپ جاتقان الەمدىك جانە ءداستۇرلى دىندەر ليدەرلەرى سەزى حاتشىلىعىنىڭ وتىرىسىندا ايتىلدى، دەپ حابارلايدى “ادىرنا” ۇلتتىق پورتالى.
سەزدە ىزگى نيەت ەلشىلەرى ينستيتۋتى قۇرىلدى جانە ەلشىلەرىنىڭ ەسىمى بەلگىلى بولدى.
رۋحاني ديپلوماتيا مۇمكىندىكتەرىن دامىتۋعا جاردەمدەسۋ ءۇشىن الەمدىك جانە ءداستۇرلى دىندەر ليدەرلەرى سەزىنىڭ ىزگى نيەت ەلشىلەرىنىڭ مارتەبەسى تۋرالى ەرەجە قابىلدانىپ، وسى لاۋازىمعا جوعارى تۇلعالار تاعايىندالدى.
ولاردىڭ قاتارىندا وتاندىق ديماش قۇدايبەرگەن، ۆەتنام بۋدديستىك سانگحانىڭ باس حاتشىسى، اتقارۋشى كەڭەس توراعاسىنىڭ ورىنباسارى تحيت دىك تحيەن، يەرۋساليمنىڭ جانە بۇكىل پالەستينانىڭ پاتريارحى ءىىى تەوفيل، مۇسىلمان اقساقالدار كەڭەسىنىڭ باس حاتشىسى مۇحاممەد ابدەلسالام جانە انگليكان قاۋىمداستىعى باس حاتشىسىنىڭ ورىنباسارى دجو بەيلي ۋەللس بار.
