الماتى وبلىسىنىڭ اكىمدىگى 10 جاستاعى بالانى يت شابۋىلىنان امان الىپ قالعان المالىباق اۋىلىنىڭ تۇرعىنى سەرىكبەك ساقايباەۆتى ماراپاتتادى، دەپ حابارلايدى "ادىرنا" ۇلتتىق پورتالى اكىمدىكتىڭ ءباسپاسوز قىزمەتىنە سىلتەپ.
مالىمەت بويىنشا، 30 ماۋسىم كۇنى المالىباق اۋىلىندا ورنالاسقان فۋتبول الاڭىندا 10 جاستىعى ماكسيمگە بىرنەشە يت شابۋىل جاساپ، بالا اۋىر جاراقات الدى.
“وقيعا ورنىنا قۇزىرلى ورگان وكىلدەرى كەلگەنشە اۋىل تۇرعىنى سەرىكبەك ساقايباەۆ ومىرىنە تونگەن قاۋىپتى ەلەمەي، يتكە قارسى تۇرىپ، بالانى ءولىم اۋزىنان اراشالاپ قالدى. بۇل – ناعىز ازاماتتىق باتىلدىق پەن شىنايى ەرلىكتىڭ ۇلگىسى”،– دەدى اكىمدىك.
سەرىكبەك ساقايباەۆتىڭ باتىلدىعى ەلەۋسىز قالمادى. قاراساي اۋدانى اكىمىنىڭ مىندەتىن اتقارۋشى رۋستام اتشاباروۆ وعان العىس حات پەن دەمەۋشىلەر اتىنان قارجىلاي سىيلىق تابىستادى.
سونىمەن قاتار، شاراعا اۋداندىق پوليتسيا باسقارماسىنىڭ باسشىسى نۇسقابەك زاۋلانباەۆ پەن توتەنشە جاعدايلار ءبولىمىنىڭ باسشىسى باعدات شارىپبەكوۆ ارنايى كەلىپ، سەرىكبەك ساقايباەۆقا العىس حات پەن ەستەلىك سىيلىق بەردى.
ەسكە سالا كەتەيىك، الماتى وبلىسى قاراساي اۋدانىندا فۋتبول الاڭىندا ويناپ جۇرگەن بالاعا جەكە اۋماقتان شىعىپ كەتكەن ءۇش يت شابۋىل جاساعان بولاتىن.
كەيىن باس پروكۋراتۋرا اتالعان فاكت بويىنشا قىلمىستىق ءىس قوزعالعانىن حابارلادى.
سونداي-اق الماتى وبلىسىنىڭ پوليتسيا دەپارتامەنتى بالانى يتتەردىڭ شابۋىلىنان امان الىپ قالعان ەر ادامنىڭ جاۋاپقا تارتىلاتىنى تۋرالى الەۋمەتتىك جەلىدە تاراعان اقپاراتتى جوققا شىعاردى.
