Elordada kópirden sekirgen jas qyzdy qutqarǵan QR IIM Ulttyq ulan jaýyngerleri marapattaldy, dep habarlaıdy “Adyrna” ulttyq portaly.
«Meniń ornymda basqa naǵyz er jigit bolsa, ol da osylaı jasar edi. Qorqaq bolyp júrgennen góri, halyq jadynda batyr bolyp saqtalyp qalǵan artyq», - dedi qatardaǵy jaýynger Narıman Myrzahmetov.
Astanada kópirden Esil ózenine sekirgen qyzdy qutqarǵan ulandyqtar marapattaldy.
Qazaqstan Respýblıkasy Ishki ister mınıstriniń orynbasary – Ulttyq ulan Bas qolbasshysynyń buıryǵymen elordalyq 5573 áskerı bólimniń áskerı qyzmetshileri qoǵamdyq tártipti qamtamasyz etý barysynda áskerı boryshty úlgili atqarǵany, ózderine júktelgen mindetterdi adal jáne yjdaǵattylyqpen oryndaǵany úshin «Ulttyq ulan ulan úzdigi» jáne «Qoǵamdyq tártipti saqtaǵany úshin» tósbelgilerimen marapattaldy.
Saltanatty rásimge QR IIM Ulttyq ulany Bas qolbasshylyǵynyń qolbasshylyǵy men jeke quramy qatysty.
QR Ishki ister mınıstriniń orynbasary – Ulttyq ulannyń Bas qolbasshysy general-maıor Ańsaǵan Baltabekov erlikpen erekshelengen jaýyngerlerdi tósbelgilermen marapattady.
- Men Ulttyq ulan Bas qolbasshylyǵy jáne jeke óz atymnan Sizderge kózsiz erlikterińiz úshin, al ata-analaryńyzǵa qıyn sátte el qorǵaýǵa daıyn osyndaı uldar tárbıelegeni úshin úlken alǵysymdy bildiremin. Mundaı batyldyq pen jaýapkershilik úlgileri jeke quramdy jaýyngerlik qyzmetti sátti oryndaýǵa shabyttandyrady. Sondyqtan biz áskerı qyzmetshilerimizdiń eńbegin laıyqty baǵalaý úshin qoldan kelgenniń bárin jasaımyz, - dedi general-maıor Ańsaǵan Baltabekov.
Atap aıtqanda, áskerı jasaq bastyǵy qatardaǵy jaýynger Narıman Myrzahmetov «Ulttyq ulan qyzmetiniń úzdigi» tósbelgisimen marapattaldy, al patrýldik qatardaǵy jaýyngerler Damır Muqashev pen Davıd Korsýnovqa «Qoǵamdyq tártipti saqtaǵany úshin» tósbelgileri tabystaldy.
Eske salaıyq, oqıǵa 2 qazan kúni keshki saǵat 22:00 shamasynda bolǵan. Ulttyq ulannyń áskerı jasaǵyna jergilikti turǵyn kómek surap kelip, Esil ózenine kópirden jas qyz sekirgenin aıtqan bolatyn.
Oqıǵa ornyna dereý jetken ulandyqtar jedel túrde qutqarý jumystaryna kiristi. Kásibılik pen tabandylyq tanytqan sarbazdar qyzdy sýdan tez shyǵaryp aldy jáne jedel járdem kelgenge deıin oǵan alǵashqy kómek kórsetti. Osylaısha, qaıǵyly jaǵdaıdy boldyrmady.
- Mundaı marapatty Bas qolbasshynyń qolynan alý men úshin úlken mártebe. Meniń ornymda basqa naǵyz er jigit bolsa, ol da osylaı jasar edi. Qorqaq bolyp júrgennen góri, halyq jadynda batyr bolyp saqtalyp qalǵan artyq. Bul – bizdiń Otan aldyndaǵy boryshymyz! Aldaǵy ýaqytta da biz óz antymyzǵa adal bolyp, elimizdiń ıgiligi úshin qyzmet etetin bolamyz, – dep atap ótti áskerı jasaq bastyǵy qatardaǵy jaýynger Narıman Myrzahmetov.
Buǵan deıin 5573 áskerı bólimi komandıriniń buıryǵymen qatardaǵy jaýynger Narıman Myrzahmetovke qysqa merzimdi 10 kúndik qyzmettik demalys berilgen edi. Al qatardaǵy jaýynger Damır Muqashev pen Davıd Korsýnovqa gramotalar men komandırlik saǵattar tabystaldy.
Aıta keteıik, Ulttyq ulannyń sarbazdary elimizdiń 21 qalasynda qoǵamdyq tártipti qamtamasyz etedi. Sondaı-aq, jaýyngerlik qyzmet kezinde olar quqyqbuzýshylar men qaýipti qylmyskerlerdi ustaýǵa, urlanǵan zattardy ıelerine qaıtarýǵa jáne joǵalǵan balalardy tabýǵa kómektesedi.
