Elordada köpırden sekırgen jas qyzdy qūtqarǧan QR IIM Ūlttyq ūlan jauyngerlerı marapattaldy, dep habarlaidy “Adyrna” ūlttyq portaly.
«Menıŋ ornymda basqa naǧyz er jıgıt bolsa, ol da osylai jasar edı. Qorqaq bolyp jürgennen görı, halyq jadynda batyr bolyp saqtalyp qalǧan artyq», - dedı qatardaǧy jauynger Nariman Myrzahmetov.
Astanada köpırden Esıl özenıne sekırgen qyzdy qūtqarǧan ūlandyqtar marapattaldy.
Qazaqstan Respublikasy Işkı ıster ministrınıŋ orynbasary – Ūlttyq ūlan Bas qolbasşysynyŋ būiryǧymen elordalyq 5573 äskeri bölımnıŋ äskeri qyzmetşılerı qoǧamdyq tärtıptı qamtamasyz etu barysynda äskeri boryşty ülgılı atqarǧany, özderıne jüktelgen mındetterdı adal jäne yjdaǧattylyqpen oryndaǧany üşın «Ūlttyq ūlan ūlan üzdıgı» jäne «Qoǧamdyq tärtıptı saqtaǧany üşın» tösbelgılerımen marapattaldy.
Saltanatty räsımge QR IIM Ūlttyq ūlany Bas qolbasşylyǧynyŋ qolbasşylyǧy men jeke qūramy qatysty.
QR Işkı ıster ministrınıŋ orynbasary – Ūlttyq ūlannyŋ Bas qolbasşysy general-maior Aŋsaǧan Baltabekov erlıkpen erekşelengen jauyngerlerdı tösbelgılermen marapattady.
- Men Ūlttyq ūlan Bas qolbasşylyǧy jäne jeke öz atymnan Sızderge közsız erlıkterıŋız üşın, al ata-analaryŋyzǧa qiyn sätte el qorǧauǧa daiyn osyndai ūldar tärbielegenı üşın ülken alǧysymdy bıldıremın. Mūndai batyldyq pen jauapkerşılık ülgılerı jeke qūramdy jauyngerlık qyzmettı sättı oryndauǧa şabyttandyrady. Sondyqtan bız äskeri qyzmetşılerımızdıŋ eŋbegın laiyqty baǧalau üşın qoldan kelgennıŋ bärın jasaimyz, - dedı general-maior Aŋsaǧan Baltabekov.
Atap aitqanda, äskeri jasaq bastyǧy qatardaǧy jauynger Nariman Myrzahmetov «Ūlttyq ūlan qyzmetınıŋ üzdıgı» tösbelgısımen marapattaldy, al patruldık qatardaǧy jauyngerler Damir Mūqaşev pen David Korsunovqa «Qoǧamdyq tärtıptı saqtaǧany üşın» tösbelgılerı tabystaldy.
Eske salaiyq, oqiǧa 2 qazan künı keşkı saǧat 22:00 şamasynda bolǧan. Ūlttyq ūlannyŋ äskeri jasaǧyna jergılıktı tūrǧyn kömek sūrap kelıp, Esıl özenıne köpırden jas qyz sekırgenın aitqan bolatyn.
Oqiǧa ornyna dereu jetken ūlandyqtar jedel türde qūtqaru jūmystaryna kırıstı. Käsıbilık pen tabandylyq tanytqan sarbazdar qyzdy sudan tez şyǧaryp aldy jäne jedel järdem kelgenge deiın oǧan alǧaşqy kömek körsettı. Osylaişa, qaiǧyly jaǧdaidy boldyrmady.
- Mūndai marapatty Bas qolbasşynyŋ qolynan alu men üşın ülken märtebe. Menıŋ ornymda basqa naǧyz er jıgıt bolsa, ol da osylai jasar edı. Qorqaq bolyp jürgennen görı, halyq jadynda batyr bolyp saqtalyp qalǧan artyq. Būl – bızdıŋ Otan aldyndaǧy boryşymyz! Aldaǧy uaqytta da bız öz antymyzǧa adal bolyp, elımızdıŋ igılıgı üşın qyzmet etetın bolamyz, – dep atap öttı äskeri jasaq bastyǧy qatardaǧy jauynger Nariman Myrzahmetov.
Būǧan deiın 5573 äskeri bölımı komandirınıŋ būiryǧymen qatardaǧy jauynger Nariman Myrzahmetovke qysqa merzımdı 10 kündık qyzmettık demalys berılgen edı. Al qatardaǧy jauynger Damir Mūqaşev pen David Korsunovqa gramotalar men komandirlık saǧattar tabystaldy.
Aita keteiık, Ūlttyq ūlannyŋ sarbazdary elımızdıŋ 21 qalasynda qoǧamdyq tärtıptı qamtamasyz etedı. Sondai-aq, jauyngerlık qyzmet kezınde olar qūqyqbūzuşylar men qauıptı qylmyskerlerdı ūstauǧa, ūrlanǧan zattardy ielerıne qaitaruǧa jäne joǧalǧan balalardy tabuǧa kömektesedı.
