ۇلتتىق كيىم-ۇلتتىڭ ءسانى عانا ەمەس، بولمىسىن دا ايشىقتايدى. ۇلتتىق ستيل – ۇلتتىق بولمىستى ايشىقتاي وتىرىپ، ەل مادەنيەتى مەن تاريحىنىڭ اجىراماس بولىگىنە اينالدى. عاسىرلار بويى قازاقتىڭ ۇلتتىق كيىمى قاراپايىم ءارى ادەمىلىگىمەن ەرەكشەلەنىپ كەلدى. ءبىزدىڭ قازاقتىڭ ۇلتتىق كيىمى – ءبىزدىڭ باي ءداستۇرىمىزدىڭ بەلگىسى، سول كيىمدى كيۋ ءاربىر ازامات پەن ازاماتشا ءۇشىن ۇلكەن ماقتانىش. ويتكەنى ونىڭ كەز-كەلگەن قازاققا جاراسا كەتەتىنى شىندىق. كوڭىلگە جىلىلىق ۇيالاتاتىن ويۋ-ورنەكپەن بەزەندىرىلگەن كيىمدەر راسىندا، كوزدىڭ جاۋىن الادى.
سوندىقتان، داستۇرىمىزگە ساي، اتادان-بالاعا ميراس بولىپ كەلە جاتقان ۇلتتىق كيىمدەردى ۇلىقتاۋ ماقساتىندا ءبىرجان سال اۋدانىنىڭ ستەپنياك قالاسىنداعى №264 رەفەرەندۋم ۋچاسكەسىنىڭ كوميسسياسى مۇشەلەرى داۋىس بەرۋشىلەردى ۇلتتىق ناقىشتاعى، ويۋمەن ورنەكتەلگەن كيىمدە قارسى الدى.
اقمولا وبلىستىق رەفەرەندۋم كوميسسياسىنىڭ مالىمەتىنشە، وبلىس بويىنشا بارلىعى 786 رەفەرەندۋم كوميسسياسى جۇمىس ىستەپ جاتىر، ونىڭ ىشىندە اقمولا وبلىسىنىڭ اۋماقتىق رەفەرەندۋم كوميسسياسى بار. ونىڭ 20 قالالار مەن اۋدانداردىڭ اۋماقتىق رەفەرەندۋم كوميسسياسى بولسا، 765 ۋچاسكەلىك رەفەرەندۋم كوميسسياسى. ونداعى كوميسسيا مۇشەسىنىڭ سانى 4540 ادامدى قۇرايدى، ونىڭ 147-ءسى اۋماقتىق رەفەرەندۋم كوميسسياسىنىڭ جانە 4393-ءى ۋچاسكەلىك رەفەرەندۋم كوميسسياسىنىڭ مۇشەلەرى.
