اقمولا وبلىسىندا قان دونورلارىن تارتۋ جۇمىسى كۇشەيتىلدى. ءوڭىر قازاقستاندا دوناتسيا ءۇشىن تولەماقىنى ارتتىرۋ تۋرالى شەشىم قابىلداعان العاشقى ءارى ازىرگە جالعىز ايماق بولىپ وتىر.
بۇل باستامانى وبلىستىق ءماسليحات دەپۋتاتتارى قولداپ، ءوڭىردىڭ دەنساۋلىق ساقتاۋ جۇيەسى ءۇشىن ماڭىزدى جاڭالىققا اينالدى.
«وبلىستىق ءماسليحات دەپۋتاتتارى وڭىردەگى دونورلاردى قوسىمشا ىنتالاندىرۋدى قولدادى. تولەماقىنىڭ ارتۋى – بۇل جاي عانا العىس ءبىلدىرۋ ەمەس، دونورلىق قوردى تۇراقتاندىرۋعا باعىتتالعان ناقتى قادام. بۇل شارا جاڭا دونورلاردى تارتۋعا جانە تۇراقتى دونورلاردى قولداۋعا مۇمكىندىك بەرەدى»، — دەدى وبلىستىق قان ورتالىعىنىڭ باسشىسى ەرمەك مۇحامەديەۆ.سالىستىرۋ ءۇشىن ايتا كەتسەك: ەلىمىز بويىنشا قان نەمەسە ونىڭ كومپونەنتتەرىن وتەۋسىز تاپسىرعان دونورعا بەرىلەتىن تولەماقى مولشەرى ايلىق ەسەپتىك كورسەتكىشتىڭ (اەك) 0,25 بولىگىن قۇرايدى — بۇل شامامەن 983 تەڭگە. ال اقمولا وبلىسىندا جەرگىلىكتى بيۋدجەت ەسەبىنەن بۇل سوما 8 مىڭ تەڭگەگە دەيىن ۇلعايتىلدى. بۇگىندە وڭىردە شامامەن بەس مىڭ تۇرعىن تۇراقتى تۇردە قان تاپسىرادى. الايدا 2025 جىلى دونورلار سانىنىڭ ازداپ تومەندەگەنى تىركەلدى. مامانداردىڭ ايتۋىنشا، بۇل — كوشى-قون، جاس ەرەكشەلىكتەرىنە بايلانىستى وزگەرىستەر، سونداي-اق ادامداردىڭ دەنساۋلىعىنا اسەر ەتكەن پوستكوۆيدتىك سالدارلار سياقتى تابيعي سەبەپتەرمەن بايلانىستى. ءاربىر قان تامشىسى بىرەۋدىڭ ءومىرىن قۇتقارا الاتىن قازىرگى جاعدايدا، جۇيەنىڭ تۇراقتىلىعىن ساقتاۋ اسا ماڭىزدى. اقمولا وبلىسى پرواكتيۆتى ۇستانىم تانىتىپ، وزگە وڭىرلەرگە ۇلگى بولا ءبىلدى.
