ەندى ساناۋلى كۇندەردەن سوڭ قازاقستان قوعامى نازارىنداعى ماڭىزدى ساياسي وقيعا – اەس قۇرىلىسى بويىنشا جالپىحالىقتىق رەفەرەندۋم وتەدى. ەلدەگى سايلاۋ ۋچاسكەلەرىندە قىزۋ دايىندىق جۇمىستارى ءجۇرىپ جاتىر.
قر ورتالىق سايلاۋ كوميسسياسىنىڭ دەرەگىنشە، وسى جولعى رەفەرەندۋمعا 177 حالىقارالىق بايقاۋشى رەسمي تىركەۋدەن وتكەن. ولاردىڭ 30-ى شەت مەملەكەتتىڭ، ونىڭ ىشىندە 4-ەۋى ءىرى حالىقارالىق ۇيىمنىڭ وكىلدەرى. جالپى العاندا، رەسپۋبليكالىق رەفەرەندۋمدى وتكىزۋ بايقاۋىنا 30 شەت مەملەكەتتىڭ وكىلدەرى قاتىسادى.
سونىمەن قاتار، ونشاقتى قازاقستاندىق تاۋەلسىز باقىلاۋشى ۇيىمدار قر ورتالىق سايلاۋ كوميسسياسىنا تىركەلىپ، الداعى ساياسي ناۋقاندا باقىلاۋشىلىق جاساماق. سونداي باقىلاۋشىلار توبىنىڭ ءبىرى - ساياساتتانۋشى نۇربولات نىشانباي باستاعان «باقىلاۋ قىراندارى».
«باقىلاۋ قىراندارى» تاۋەلسىز باقىلاۋشىلار توبى قىركۇيەكتىڭ باسىندا قۇرىلدى. باقىلاۋشىلاردى وقىتۋ كۋرستارى قىركۇيەك ايىندا بىرنەشە ايماقتاردا جانە ءىرى قالالاردا جۇرگىزىلدى.
«ءبىر اي بۇرىن الەۋمەتتىك جەلىدە باقىلاۋشىلىق توپ قۇرۋ تۋرالى باستاما كوتەردىم. ناتيجەسىندە ساياساتتانۋشى ارىپتەستەرىمنەن قولداۋ تاۋىپ، سوڭعى ءتورت اپتادا «باقىلاۋ قىراندارى» توبى قالىپتاستى. ءبىزدىڭ باستى ماقساتىمىز رەسپۋبليكا بويىنشا رەفەرەندۋم بارىسىن باقىلاۋ. ءبىزدىڭ ۇستانىمىمىز – ءاربىر داۋىس ءادىل سانالۋى ءتيىس! سول ءۇشىن دە ءبىزدىڭ باقىلاۋشىلارىمىز رەفەرەندۋم كۇنى ەلىمىزدىڭ بىرقاتار وڭىرىندە سايلاۋ ۋچاسكەلەرىندە زاڭ ەرەجەلەرىنىڭ ساقتالىپ جاتقانىنا كوز جەتكىزىپ، باقىلايتىن بولادى. ءبىزدىڭ وكىلدەرىمىز سايلاۋ ۋچاسكەلەرىندە تاڭنان كەشكە دەيىن قىراعىلىق تانىتىپ، ازاماتتىق بورىشىن وتەيتىن بولادى»، - دەيدى نۇربولات نىشانباي.
