جوعارعى سوت كەڭەسىنىڭ قۇرامى قايتا قارالادى. بۇل تۋرالى استانادا وتكىزىلىپ جاتقان قازاقستان سۋديالارىنىڭ سەزىندە پرەزيدەنت قاسىم-جومارت توقاەۆ ايتتى، دەپ حابارلايدى “ادىرنا” ۇلتتىق پورتالى.
«جوعارعى سوت كەڭەسى تاۋەلسىز ءارى كاسىبي سوتتار كورپۋسىن قۇرۋدا گارانت بولۋى ءتيىس. سوندا عانا سوت جۇيەسى قۇقىقتىڭ ۇستەمدىگىن، ازاماتتار مەن بيزنەستىڭ قۇقىعىنىڭ شىنايى قورعالۋىن قامتاماسىز ەتە الادى. وسى ماقساتتا 2021 جىلى جوعارى سوت كەڭەسىنەن ادىلەت ءمينيسترى، مەملەكەتتىك قىزمەت ىستەرى اگەنتتىگىنىڭ باسشىسى شىعارىلدى. ارى قاراي وسى جۇمىستى جالعاستىرىپ، سۋديالاردى ىرىكتەۋدىڭ اشىقتىعىن قامتاماسىز ەتۋ ءۇشىن جوعارعى سوت كەڭەسىنىڭ قۇرامىن قايتا قاراۋ كەرەك.
حالىقارالىق تاجىريبە وسىنداي ورگانداردا پروكۋراتۋرا وكىلدەرى بولۋى كەرەكتىگىن كورسەتەدى. جوعارعى سوت كەڭەسىنىڭ ۇيلەسىمدى قۇرامىن قالىپتاستىرۋدى دۇرىستاپ زەرتتەگەن ابزال. سونىمەن بىرگە، سۋديالاردى ءاردايىم ءوز قۇزىرەتىن ارتتىرىپ، ءوز جۇمىسىنا جاۋاپتى تۇردە كەلۋىنە جىگەرلەندىرگەن ءجون. ءبىز جوعارعى سوتتىڭ سۋديالاردىڭ بىلىكتىلىك ساناتىن قايتارۋ باستاماسىن قولدايمىز. سوتتىڭ كاسىبيلىگى بارىنشا شىنايى بولۋى ءتيىس. بۇل قادام سۋديالار كورپۋسىنىڭ كادرلىق قۇرامىنىڭ ساپاسىن ارتتىرار دەگەن سەنىمدەمىن»، – دەيدى پرەزيدەنت.
ايتا كەتسەك، جوعارعى سوت كەڭەسى – قازاقستان پرەزيدەنتىنىڭ سوتتاردى قالىپتاستىرۋ جونىندەگى كونستيتۋتسيالىق وكىلەتتىكتەرىن، سۋديالاردىڭ تاۋەلسىزدىگى مەن ولارعا ەشكىمنىڭ تيىسپەۋ كەپىلدىكتەرىن قامتاماسىز ەتۋ ماقساتىندا قۇرىلعان. جاقىندا ونىڭ باسشىسى بولىپ دميتري مالاحوۆ تاعايىندالعان.
