فوتو: اقوردا
بۇگىن، 16 قازاندا ەرەۆاندا پرەزيدەنت قاسىم-جومارت توقاەۆ COP17 اياسىنداعى بيوالۋانتۇرلىلىك بويىنشا كوشباسشىلار سامميتىندە تابيعاتتى ساقتاۋ ءۇشىن حالىقارالىق كۇش-جىگەردى ۇيلەستىرۋ قاجەت ەكەنىن ايتتى. بۇل تۋرالى اقوردا جازدى، دەپ حابارلايدى "ادىرنا".
مەملەكەت باسشىسى سامميتكە قاتىسۋشىلارعا ءىلتيپات ءبىلدىرىپ، قوناقجايلىعى جانە جيىندى جوعارى دەڭگەيدە ۇيىمداستىرعانى ءۇشىن ارمەنيا پرەمەر-ءمينيسترى نيكول پاشينيانعا العىس ايتتى.
پرەزيدەنت تابيعاتتى قورعاۋ – بولاشاق ۇرپاق الدىنداعى ورتاق جاۋاپكەرشىلىك ەكەنىن اتاپ ءوتتى.
ء"بىز تابيعات تارتۋىن بولاشاققا جەتكىزۋدى كوزدەيتىن حالىقارالىق ىنتىماقتاستىقتى كەڭەيتۋ ماقساتىندا جينالىپ وتىرمىز. ياعني كۇردەلى سىن-قاتەرلەرمەن بەتپە-بەت كەلۋى ىقتيمال وسكەلەڭ ۇرپاق الدىنداعى ورتاق جاۋاپكەرشىلىك جونىندە ءسوز قوزعادىق. بۇل – ءبىزدىڭ وركەنيەتىمىزدىڭ امان قالۋىنا دا قاتىستى ماسەلە", – دەدى قاسىم-جومارت توقاەۆ.
ونىڭ ايتۋىنشا، بيوالۋانتۇرلىلىك ادامداردىڭ يگىلىگى، ەكونوميكالىق ورنىقتىلىق پەن ۇزاقمەرزىمدى قاۋىپسىزدىك ءۇشىن اسا ماڭىزدى. ال بۇلىنبەگەن ەكوجۇيەلەر ازىق-تۇلىك وندىرىسىندە، سۋ رەسۋرستارىن قورعاۋدا جانە ميلليونداعان ادامدى كىرىس كوزىمەن قامتۋدا ماڭىزدى ءرول اتقارادى.
مەملەكەت باسشىسى شولەيتتەنۋ، سۋ تاپشىلىعى جانە باسقا دا ەكولوگيالىق پروبلەمالار تابيعات پەن ادام اراسىنداعى تەپە-تەڭدىككە قاۋىپ ءتوندىرىپ وتىرعانىنا نازار اۋداردى.
"سۋدىڭ جەتكىلىكسىزدىگى مەن جەردىڭ توزۋى ميلليونداعان ادام ءۇشىن ۇيرەنشىكتى جاعدايعا اينالدى. مۇنىڭ سالدارى تىم اۋىر. سەبەبى بۇل ۇدەرىستەر مەملەكەتتەر اۋماعىنان ارى اسىپ، ورنىقتى دامۋدى تەجەيدى ءارى جاھاندىق تۇراقتىلىققا زاردابىن تيگىزەدى", – دەدى پرەزيدەنت.
قاسىم-جومارت توقاەۆ ەكولوگيالىق ماسەلەلەردى شەشۋدە ناقتى ناتيجەگە باعىتتالعان حالىقارالىق سەرىكتەستىك قاجەت ەكەنىن ايتتى.
"مۇقيات ويلاستىرىلعان جانە ناقتى شارالاردى قامتيتىن ەكولوگيالىق كۇن ءتارتىبى ساياسي قايشىلىقتاردى ەڭسەرۋى قاجەت. بىزگە شىنايى سەرىكتەستىككە، ءبولىپ-جارماۋعا نەگىزدەلگەن، ەڭ باستىسى، ناقتى ناتيجەلەرگە قول جەتكىزۋدى كوزدەيتىن حالىقارالىق ىنتىماقتاستىق كەرەك", – دەدى مەملەكەت باسشىسى.
