الەۋمەتتىك جەلىدە اقتاۋداعى ايالدامانىڭ ۆيدەوسى تاراپ، كوپتىڭ نارازىلىعىنا ۇشىرادى، دەپ حابارلايدى "ادىرنا" ۇلتتىق پورتالى.
ايالدامادا جولاۋشىلارعا ارنالعان وتىرعىش بيىك بولعان. جەلىدەگى بەينەدە ەر ادامنىڭ وعان وتىرا الماي، قينالعانىن كورۋگە بولادى.
Massaget.kz مالىمەتىنشە، اقتاۋ قالالىق جولاۋشىلار كولىگى جانە اۆتوموبيل جولدارى ءبولىمى ايالداماعا قاتىستى ءتيىستى جاۋاپ جولداعان.
"اقتاۋدا جاڭا 20 الەۋمەتتىك اۆتوبۋس ايالداماسىن ورناتۋ جۇمىستارى جۇرگىزىلىپ جاتىر. قازىر جاڭا ايالدامالار اۆتوموبيل جولدارىنىڭ قاجەتتى اۋماقتارىنا ورناتىلىپ جاتىر. بۇل اۆتوبۋس ايالداماسى ءالى بەكىتىلمەگەن. وسى اپتادا تولىعىمەن ورناتىلادى. ينجەنەرلىك جەلىلەر قۇرىلىسىنا بايلانىستى توقتاپ تۇرعان ەدى، جولدى جوندەۋ اياقتالعاننان كەيىن ايالداما ورناتىلادى", – دەلىنگەن جاۋاپتا.
جەلىدەگى جۇرت "سۋ تاسقىنى بولا قالسا كەمەنى كۇتەتىن ايالداما ەكەن", "قارتتار كۇنىنە اكىمدىكتىڭ سىيلىعى بولار", "بۇل ءالى تولىق بىتپەگەن عوي", "تەك بويى ۇزىن ادامدارعا ارنالعان وتىرعىش قوي" دەپ ءتۇرلى پىكىر جازعان.
