قازاقستان رەسپۋبليكاسىنىڭ پرەزيدەنتى جانىنداعى قازاقستاننىڭ ستراتەگيالىق زەرتتەۋلەر ينستيتۋتىنىڭ تاپسىرىسى بويىنشا «دەموكراتيا ينستيتۋتى» عزق قب 2024 جىلدىڭ 13-26 قىركۇيەك ارالىعىندا تەلەفون ارقىلى ساۋالناما جۇرگىزدى. ساۋالناماعا 18 جاستان اسقان 1 200 رەسپوندەنت قاتىستى. ساۋالناماعا 17 وبلىس پەن رەسپۋبليكالىق ماڭىزى بار استانا، الماتى جانە شىمكەنت قالالارىنىڭ رەسپوندەنتتەرى قاتىستى.
جالپى رەسپوندەنتتەردىڭ باسىم بولىگى – 72,9%-ى اتوم ەلەكتر ستانتسياسىن سالۋ يدەياسىن قولدايدى. «قازاقستاندا اەس سالۋ يدەياسىنا كوزقاراسىڭىز قانداي؟» دەگەن سۇراققا رەسپوندەنتتەردىڭ شامامەن ۇشتەن ەكىسى وڭ كوزقاراس ءبىلدىردى.
الدىندا جاريالانعان ساۋالناما قورىتىندىلارىمەن سالىستىرعاندا، بۇل قازىرگى ۋاقىتتا ەڭ جوعارى كورسەتكىش. ءبىرىنشى ساۋالناما قورىتىندىلارىمەن سالىستىرعاندا، اەس قۇرىلىسىن قولداۋشىلاردىڭ ۇلەسى 19,8 پايىزدىق تارماققا، ەكىنشىسىمەن سالىستىرعاندا 12,7 پايىزدىق تارماققا ءوستى. اعىمداعى ءۇردىستى ەسكەرسەك، اتوم ەلەكتر ستانتسياسىن قولداۋشىلاردىڭ سانى سايلاۋ كۇنىنە قاراي ودان ءارى ارتۋى مۇمكىن دەگەن بولجام جاساۋعا بولادى.
رەسپوندەنتتەردىڭ 22,3%-ى اتوم ەلەكتر ستانتسياسىن سالۋ يدەياسىنا تەرىس كوزقاراس ءبىلدىردى; 4,8%-ى جاۋاپ بەرۋگە قينالدى.
تەلەفون ارقىلى جۇرگىزىلگەن ساۋالناما ناتيجەلەرى رەسپوندەنتتەردىڭ 62%-ىنىڭ ازاماتتىق ۇستانىمى بار ەكەنىن جانە رەفەرەندۋمعا قاتىسۋعا نيەت بىلدىرەتىنىن كورسەتەدى.
ماسەلەن، «قازاقستاندا اتوم ەلەكتر ستانتسياسىنىڭ (اەس) سالۋ ماسەلەسى جالپىۇلتتىق رەفەرەندۋم ارقىلى شەشىلەتىن بولادى. ءسىز رەفەرەندۋمعا قاتىسۋعا دايىنسىز با؟» دەگەن سۇراققا 46,3%-ى ناقتى نيەت تانىتتى، 15,7%-ى قاتىسۋعا تىرىسامىن دەپ جاۋاپ بەردى.
وسىعان دەيىنگى ساۋالناما قورىتىندىلارىمەن سالىستىرعاندا، داۋىس بەرۋگە نيەتتى رەسپوندەنتتەردىڭ ۇلەسى 59%-دان 62%-عا دەيىن ءوستى. رەسپوندەنتتەردىڭ 19,3%-ى رەفەرەندۋمعا قاتىسۋدى كوزدەمەيدى، 18,7%-ى ءالى شەشىم قابىلداماعان.
ساۋالنامانى 2024 جىلدىڭ 13-26 قىركۇيەك ارالىعىندا «دەموكراتيا ينستيتۋتى» عزق قب جۇرگىزدى. زەرتتەۋدە تەلەفون ارقىلى سۇحبات الۋ ءادىسى قولدانىلدى.
ساۋالناماعا 17 وبلىس پەن رەسپۋبليكالىق ماڭىزى بار استانا، الماتى جانە شىمكەنت قالالارىنىڭ 18 جاستان اسقان رەسپوندەنتتەرى قاتىستى. ىرىكتەۋ كولەمى 1 200 رەسپوندەنتتى قۇرايدى. ستاتيستيكالىق قاتەلىك 2,5%-دان اسپايدى.
