بيزنەس جاساپ، تەز بايىپ كەتكىڭىز كەلسە...

392

بيزنەس اشۋ يدەياڭىز بار ما؟ نەمەسە قالاي دا تابىسقا جەتۋ تۋرالى كوپ ويلايسىز با؟ ەندى، ءوزىم بايقاعان بيزنەستەگى ماڭىزدى قاعيدالار مەن قاتەلىكتەر تۋرالى ايتايىن.

العاشقى بيزنەستەن قازىرگە دەيىن 11 جىل. ءسۇرىندىم، تۇردىم، قۇلادىم، قوشتاستىم، قايتا ورالدىم، ورگە ءجۇردىم، ەڭىسكە ءتۇستىم، قايتا ورلەدىم. بىراق، ءومىر وسىنىسىمەن قىزىق ەكەن. جەڭدىم بە، ءالى يتجىعىس پا؟ ءوز پوتەنتسيالىمدى تولىق پايدالانا الدىم با؟ ونى الداعى بەس جىلدا تولىق دالەلدەيمىن دەپ ويلايمىن. ءدال قازىر باعىت انىق، جولدى ءوزىم سىزىپ كەلەمىن، سەبەبى، سۇرلەۋگە تۇسكىم كەلمەيدى. دايىن سۇرلەۋگە تۇسسەڭىز، باسەكەلەستەرىڭىز بەن قارسىلاستارىڭىزعا جەم بولاسىز.

تۇسىنىكتى بولۋ ءۇشىن ناقتى سۇراقتارعا جاۋاپ بەرىپ باستايىن. سۇراقتار نەگىزىندە وي قورىتايىق.

جۇرتتىڭ كوكەيىندەگى ءبىرىنشى سۇراق:

قانداي بيزنەس جاساعان دۇرىس؟ قانداي بيزنەس جاساپ تەز بايىپ كەتۋگە، تابىسقا جەتۋگە بولادى؟

اركىم ءۇشىن ەڭ تابىستى بيزنەس - ءوزى ەڭ جاقسى بىلەتىن سالا. ءوزىڭىزدىڭ كاسىبىڭىزدىڭ بيزنەسكە اينالۋى.
وتكەندەگى ءوزىم ىستەگەن ءتورت بيزنەسكە ءبىر قادام شەگىنىس جاسايىن. ءبىرىنشىسى - كافە. كافە بيزنەسىندە مەن جاقسى تابىسقا جەتتىم. سەبەبى، مەن وعان دەيىن اسحاناداعى كوكونىس تۋراۋشىدان قامىر يلەۋشىگە، ودان اسپازعا دەيىنگى ءبىراز باسقىشتى باستىم. توي قۋالاپ، ءبىراز تامادالىق ىستەپ، بانكەت باسقارىپ كوردىم. بۇل كافە اشقان كەزدە كوپ قاتەلىك جىبەرمەۋگە ۇلكەن ساباق بولدى. اس ءۇيدىڭ مازىرىنەن شاتاسپاي، تاپسىرىس بەرۋشىنىڭ ءتىلىن تابۋعا سەپتىگىن تيگىزدى.

ەكىنشى بيزنەس - ينتەرنەت كلۋبى، مەن سىرتتاي كومەكشى بولدىم، سەبەبى، جاقسى بىلمەيتىن ەدىم، بار قۇقىقتى بىلەتىن دوسىما بەردىم، ول زيان اكەلمەدى، اسا ۇلكەن پايدا دا بەرمەدى.
ءۇشىنشى بيزنەس - مينيماركەت. بۇل بيزنەس مەنى ءبىر رەت بيزنەسپەن قوشتاستىردى. ءوز قاتەلىگىمنەن بانكروتقا ۇشىرادىم. سەبەبى، مەن ءۇشىن بۇل سالا جۇمباق ەدى. شەتىن كورە سالا "پايدا دەگەن وسى" دەپ ۇرىندىم. ناتيجەسىندە "تۇمسىقتان" ادەمىلەپ "تاياق" جەدىم. بۇدان تىس تا قاتەلىگىم بولدى، ونى كەيىنگى ءبىر سۇراقتا قوزعارمىن.

ءتورتىنشى بيزنەس - قازىرگىم. جۇرت ماعان اقىل سۇراپ كەلەدى. كەيبىر ورتالىقتارعا سىرتتاي دا جەتەكشىلىك ەتەمىن. ءۇش جىلدا، ەكى قالادا ءۇش ورتالىق اشىپ، ۇلكەن كورسەتكىشپەن ءبىراز جۇرتتى مويىنداتتىق. ءبىراز جۇرت بىزگە قاراپ ورتالىق اشقىسى كەلەدى.

بىراق، مەنىڭ بۇعان دەيىنگى بۇل جولداعى تاجىريبەم جەتكىلىكتى ەدى. سوندىقتان دا، قارىزبەن باستاپ، وسى كەزگە جەتۋىم - تەك بۇل سالانىڭ جىلىگىن شاعىپ، مايىن ىشكەنىمنىڭ ارقاسى. ول - ءۇش جىلعى ەمەس، العاش مۇعالىم بولۋدان ورتالىق اشۋعا دەيىنگى تاجىريبەنىڭ ارقاسى.
ءبىر سوزبەن ايتقاندا، مۇنى "كاسىبيلىك" دەيدى. ولاي بولسا، قانداي بيزنەس ىستەسەڭىز دە ءوزىڭىز وتە جاقسى بىلەتىن سالادا، ءوز كاسىبىڭىزدە ىستەڭىز. كوپ ادامدار "بىرەۋ مىناداي بيزنەس اشىپ، ەكى جىلدا بايىپ كەتىپتى، ءبىز دە ىستەيىك، بۇل سالادا اقشا كوپ ەكەن" دەپ بيزنەس باستايدى، بۇل - ۇلكەن قاتەلىك. "كورمەگەن جەردىڭ ويلى شۇڭقىرى كوپ" دەيدى اتام قازاق.
بۇل تۋرالى "ورتالىق اشۋ وڭاي ما؟" دەگەن ماقالامدا دا ايتقان ەدىم.
ايتپاقشى، بىردە، ءبىر جاقىن ارالاساتىن تاماشا اقىن اعام حابارلاسىپ، جۇمىسقا ىزدەپ كەلىپتى.
- اياتجان، ورتالىق اشايىن دەپ ەدىم، اقىل-كەڭەسىڭدى بەرشى، - دەيدى. ەندى، ۇزاق ۋاقىتتان بەرى ارالاساتىن اعامنىڭ ءبىزدىڭ سالادان مۇلدە حابارى جوق ەكەنىن بىلەمىن.
- اعا، مەنىڭ سىزگە بەرەتىن كەڭەسىم، اشپاي-اق قويىڭىز، - دەدىم.
- نەگە؟ سەن ەكى-اق جىلدا...، - دەپ سۇراۋلى كوزبەن قارادى. - ءيا، اعا. اشپاڭىز، مەن ءسىزدى وزىممەن باسەكەلەس بولادى، ايتپەسە مەنىڭ نانىمدى تارتىپ الادى دەپ تۇرعانىم جوق. "بازار ءبىر بولسا دا، باق باسقا" دەگەن. بىراق، ءسىز بۇل سالادا مىنا تۇيىندەرگە جاۋاپ بەرە الاسىز با؟ مىنا قيىندىقتى جەڭە الاسىز با؟ - دەپ، سۇراقتى بۇرقىراتىپ ەدىم.
- راحمەت، باۋىرىم. مەن تىم جەڭىل ويلاعان ەكەنمىن، - دەپ، كەتتى. قازىر دە جاقسى ارالاسامىن، كەزدەسكەندە تەككە زيان شەكپەگەنىنە قۋانامىن. سەبەبى، جىلدا كۇزدە، قىركۇيەكتىڭ باسىندا، تەك استانانىڭ وزىندە 20-دان اسا ورتالىق اشىلادى، مەن بىلەتىن. بىراق، ناۋرىزدا سونىڭ ءتورت-بەسەۋى عانا ءومىر ءسۇرىپ قالادى. قالعانى بانكروت. وبال دەشى. كەيدە، ءبىر بۇل سالانى جاقسى بىلەتىن قىز-جىگىتتەر كەڭەس سۇراپ كەلەدى. كەيبىرىنە بىرەر ساعات، كەيبىرىنە ەكى-ءۇش اي كەڭەس بەرىپ جەتەلەيمىن. قازىر ءبىرازى جاقسى ناتيجەگە جەتىپ ءجۇر.
ال، ءسىز قاي سالادا بيزنەس باستاۋدى ويلاپ ءجۇرسىز؟
ءسىزدى بيزنەستە نە مازالايدى؟

اياتجان احمەتجانۇلى

"ادىرنا" ۇلتتىق پورتالى

پىكىرلەر