قازاقستاندا اسكەري مەديتسينا اكادەمياسى اشىلاتىنى ايتىلدى، دەپ حابارلايدى "ادىرنا" ۇلتتىق پورتالى قورعانىس مينيسترلىگىنىڭ ءباسپاسوز قىزمەتىنە سىلتەپ.
«قورعانىس مينيسترلىگى اسكەري مەديتسينا اكادەمياسىن اشۋدى جوسپارلاپ وتىر. وسى ماقساتتا قازاقستان رەسپۋبليكاسى قارۋلى كۇشتەرىنىڭ باس اسكەري-مەديتسينالىق باسقارماسى مامانداندىرىلعان جوعارى وقۋ ورنىن قۇرۋ جوباسىن دايىندادى»، - دەلىنگەن حابارلامادا.
قازىرگى ۋاقىتتا جوعارى مەديتسينالىق ءبىلىم بەرۋ جانە اسكەري ينتەرناتۋرا باعدارلامالارى بويىنشا اسكەري دارىگەرلەردى اقتوبە قالاسىنداعى اۋە قورعانىسى كۇشتەرىنىڭ اسكەري ينستيتۋتى بازاسىندا مارات وسپانوۆ اتىنداعى باتىس قازاقستان مەديتسينا ۋنيۆەرسيتەتىمەن بىرلەسىپ دايىندايدى. ال جوعارى وقۋ ورنىنان كەيىنگى مەديتسينالىق ءبىلىم بەرۋ باعدارلاماسى بويىنشا اسكەري-مەديتسينالىق كادرلاردى دايىنداۋ «استانا» مەديتسينالىق ۋنيۆەرسيتەتىمەن اكادەميالىق ۇتقىرلىق شەڭبەرىندە قر ۇلتتىق قورعانىس ۋنيۆەرسيتەتىنىڭ اسكەري مەديتسينا كافەدراسىنىڭ بازاسىندا جۇزەگە اسىرىلادى.
حالىقارالىق ىنتىماقتاستىق جەلىسى بويىنشا رەسەيدە، وزبەكستاندا، ارمەنيادا، قىتايدا جانە تۇركيادا جوعارى جانە جوعارى وقۋ ورنىنان كەيىنگى مەديتسينالىق ءبىلىم بەرۋ باعدارلامالارى بويىنشا ماماندار دايارلانادى. شەتەلدە اسكەري مەديتسينالىق ءبىلىم الۋ تىلدىك كەدەرگىلەردىڭ، ۇلتتىق جانە مادەني ايىرماشىلىقتاردىڭ بولۋىمەن، سونداي-اق ديپلومدى تانۋ راسىمدەرىنىڭ ەرەكشەلىكتەرىمەن بايلانىستى ەكەنىن اتاپ وتكەن ءجون.
جوبانى ىسكە اسىرۋ قولدا بار مەكەمەلەردى قايتا ۇيىمداستىرۋدى، ۇيىمداستىرۋ شارالارىن جۇرگىزۋدى، قاجەتتى ينفراقۇرىلىمدى، اكادەميانىڭ وقۋ-ماتەريالدىق بازاسىن قۇرۋدى، ءبىلىم بەرۋ باعدارلامالارىن ازىرلەۋدى جانە ليتسەنزيا الۋدى تالاپ ەتەدى.
جاڭا ءبىلىم بەرۋ مەكەمەسى الماتى قالاسىنداعى قورعانىس مينيسترلىگىنىڭ اسكەري مەديتسينا ورتالىعى بازاسىندا قۇرىلماق.
ءىس-شارالار قورعانىس ۆەدومستۆوسىنىڭ مۇددەلى قۇرىلىمدىق بولىمشەلەرىمەن، دەنساۋلىق ساقتاۋ، عىلىم جانە جوعارى ءبىلىم مينيسترلىكتەرىمەن، «قازاقستان-رەسەي مەديتسينالىق ۋنيۆەرسيتەتى» مەملەكەتتىك ەمەس ءبىلىم بەرۋ مەكەمەسى جانە «اسكەري مەديتسينا ارداگەرلەرى» قوعامدىق بىرلەستىگىمەن بىرلەسىپ وتكىزىلەدى.
