وتكەندە دوسىم رەسەيدەگى التاي رەسپۋبليكاسىنا بارىپ كەلدى. سويتسە، ول جاقتاعى التاي قىزدارى ءبىزدىڭ تورەعالي مەن قايرات نۇرتاستى تىڭدايدى ەكەن. بۇلاردىڭ قازاقستاننان ەكەنىن كورىپ بىلگەسىن "و، تورەعالي، قايرات نۇرتاس!" دەپتى.
ينتەرنەتتەگى قازاق كليپتەرىنىڭ كورىلىمىن ارتتىرىپ، ءولىپ تۇرىپ كورەتىن وسى اينالامىزداعى تۇركى حالىقتارى ەكەنىن ولاردىڭ سول ۆيدەونىڭ استىنا جازاتىن كوممەنتتەرىنەن دە كورىپ ءجۇرمىز. مەنىڭ بايقاعانىم، باسقا قىرعىز، وزبەك، رەسەيلىك تۇركى حالىقتارى دا ءبىزدىڭ ونەردى جاقىن تۇتىپ، قاتتى تارتىلادى ەكەن.
ەندى كەشە يۋتۋبتەن ءبىر نوعاي جىگىتىنىڭ "قازاعىم، ءبىزدىڭ ءۇمىتىمىزدى ۇزبەڭىزدەر" دەگەن جولداۋىن كوردىم. بۇل جىگىت "وتىز جىل بارشا تۇركى حالىقتارىنىڭ ءۇمىتى قازاقتا بولىپ ەدى، وكىنىشكە وراي ولار ءۇمىتتى اقتامادى، بىراق ءالى دە ءۇمىتىمدى ۇزبەيمىن" دەپتى. بۇل بەكلەربەك دەگەن اككاۋنت يەسى ەكەن، ءوزىن تاريحشى جىگىت اۋ دەپ شامالادىم.
"ارامىزداعى ەڭ ءىرى جانە الەۋەتتى حالىق رەتىندە قازاق حالقى ءوزى ۇيىتقى بولىپ ءبارىمىزدى باستاپ شىعىپ، ياعني كوشپەلى جۇرتتىڭ باسىن بىرىكتىرىپ، ەڭسەمىزدى تىكتەۋگە ۇلكەن سەپتىگىن تيگىزەدى" دەگەن بۇل بايعۇس باۋىرلارىمىزدىڭ ماقساتى، ىشكى ارمانى بولسا كەرەك. ونى ءبىز اقتاماپپىز، ءبىزدىڭ شالعا بۇل دا وكپەلى سياقتى، ءوزى قاراداي نالىپ وتىر.
راسىندا، كوپتەگەن تۇركى جۇرتى ءبىزدى، قازاقتاردى، بابالار اماناتىن ارقالاعان حالىق دەپ ساناپ، بىزدەن ۇلكەن ءۇمىت كۇتەدى، وندايدى مەن ءبىرىنشى رەت ەستىپ تۇرعان جوقپىن.
بۇل نوعاي جىگىت وزگە روليكتەرىندەگى سوزدەرىندە بۇگىنگى قازاق ەلىن، بۇرىڭعى تاريحي كوشپەندىلەر يمپەرياسىنىڭ ناقتى مۇراگەرى رەتىندە تانىپ، ءبىزدىڭ سىرتتاي تىلەۋىمىزدى تىلەپ وتىرادى ەكەن، ونىسىنا راحمەت.
"ادىرنا" ۇلتتىق پورتالى
