Ótkende dosym Reseıdegi Altaı respýblıkasyna baryp keldi. Sóıtse, ol jaqtaǵy altaı qyzdary bizdiń Tóreǵalı men Qaırat Nurtasty tyńdaıdy eken. Bulardyń Qazaqstannan ekenin kórip bilgesin "o, tóreǵalı, qaırat nurtas!" depti.
Internettegi qazaq klıpteriniń kórilimin arttyryp, ólip turyp kóretin osy aınalamyzdaǵy túrki halyqtary ekenin olardyń sol vıdeonyń astyna jazatyn kommentterinen de kórip júrmiz. Meniń baıqaǵanym, basqa qyrǵyz, ózbek, reseılik túrki halyqtary da bizdiń ónerdi jaqyn tutyp, qatty tartylady eken.
Endi keshe ıýtýbten bir noǵaı jigitiniń "qazaǵym, bizdiń úmitimizdi úzbeńizder" degen joldaýyn kórdim. Bul jigit "otyz jyl barsha túrki halyqtarynyń úmiti qazaqta bolyp edi, ókinishke oraı olar úmitti aqtamady, biraq áli de úmitimdi úzbeımin" depti. Bul Beklerbek degen akkaýnt ıesi eken, ózin tarıhshy jigit aý dep shamaladym.
"Aramyzdaǵy eń iri jáne áleýetti halyq retinde qazaq halqy ózi uıytqy bolyp bárimizdi bastap shyǵyp, ıaǵnı kóshpeli jurttyń basyn biriktirip, eńsemizdi tikteýge úlken septigin tıgizedi" degen bul baıǵus baýyrlarymyzdyń maqsaty, ishki armany bolsa kerek. Ony biz aqtamappyz, bizdiń shalǵa bul da ókpeli sııaqty, ózi qaradaı nalyp otyr.
Rasynda, kóptegen túrki jurty bizdi, qazaqtardy, babalar amanatyn arqalaǵan halyq dep sanap, bizden úlken úmit kútedi, ondaıdy men birinshi ret estip turǵan joqpyn.
Bul noǵaı jigit ózge rolıkterindegi sózderinde búgingi Qazaq Elin, buryńǵy tarıhı kóshpendiler ımperııasynyń naqty murageri retinde tanyp, bizdiń syrttaı tileýimizdi tilep otyrady eken, onysyna rahmet.
"Adyrna" ulttyq portaly
