ساپارباەۆتىڭ سوزىنشە، 200-300 مىڭ تەڭگە (520-700 دوللار) تاباتىن وتباسىلار تابىسىن 40-60 مىڭ تەڭگە (103-155 دوللار) دەپ كورسەتكەن.
مينيستر ورىنباسارى وتباسىلاردىڭ تابىسى ولاردىڭ زەينەتاقى قورى سالىمدارىنا بايلانىستى تەكسەرىلگەنىن ايتتى. ونىڭ سوزىنشە، قازىر ۇكىمەت پەن اكىمدىكتەر وتباسىلاردىڭ ناقتى قانشا تابىسى بارىن انىقتاۋ ءۇشىن جۇمىس ىستەپ جاتىر.
17 تامىزدا قازاقستان ەڭبەك جانە حالىقتى الەۋمەتتىك قورعاۋ مينيسترلىگى 21 مىڭ وتباسى اتاۋلى كومەك الۋ ءۇشىن تابىسىن جاسىرعان دەپ مالىمدەگەن.
بيىل اقپاندا ەلدە كوپ بالالى ايەلدەردىڭ بيلىككە تالابى كۇشەيگەن تۇستا قازاقستان ۇكىمەتى تۇرمىسى تومەن وتباسىلارعا اتاۋلى الەۋمەتتىك كومەك تولەيتىندەرىن جاريالاعان. انالار نارازىلىعى 4 اقپاندا نۇر-سۇلتاندا ۋاقىتشا باسپاناداعى ورتتەن كەيىن باستالعان. سول وقيعادان ءبىر وتباسىنىڭ بەس بالاسى قازا تاپقان.
27 اقپاندا “نۇر وتان” پارتياسىنىڭ جيىنىندا سول كەزدەگى ەل پرەزيدەنتى نۇرسۇلتان نازارباەۆ تۇرمىسى تومەن وتباسىلارعا الەۋمەتتىك كومەكتى 70 پايىزعا ءوسىرۋدى، كوپ بالالى وتباسىلاردىڭ ءار بالاسىنا 21 مىڭ تەڭگە تولەۋدى بۇيىرعان. كەيىن پارلامەنت اتاۋلى الەۋمەتتىك كومەك تۋرالى زاڭ قابىلداپ، وعان نازارباەۆتىڭ ورنىنا كەلگەن قازىرگى پرەزيدەنت قاسىم-جومارت توقاەۆ قول قويعان.
ساۋىردەن باستاپ جەرگىلىكتى بيلىك وتباسىلاردان الەۋمەتتىك كومەككە قۇجات قابىلداي باستاعان. بىراق ايەلدەر قۇجات وتكىزۋدىڭ قيىندىعىن ايتىپ، ءجيى شاعىمدانادى.
21 تامىزدا “نۇر وتان” جيىنىندا پارتيا توراعاسى نازارباەۆ كوپ بالالى ايەلدەر مەن شەتەلدەن كوشىپ كەلگەن قازاقتاردى “بيلىكتەن كومەك سۇراي بەرەدى” دەپ سوكتى.
- "ماعان بەر، مەنىڭ بالام كوپ، ايلىعىم از" دەيدى. سەن نە ويلادىڭ؟ بۇل – سەنىڭ ماسەلەڭ عوي، سەن بۇرىن مەملەكەتپەن اقىلداسپادىڭ عوي" دەدى نازارباەۆ پارتيا جيىنىندا.
ەڭبەك جانە حالىقتى الەۋمەتتىك قورعاۋ مينيسترلىگىنىڭ ەسەبىنشە، 15 تامىزداعى جاعداي بويىنشا 1,8 ميلليون قازاقستاندىق ااك العان. بيۋدجەتتەن ااك تولەۋ ءۇشىن 103 ميلليارد تەڭگە (335 ملن دوللار) بولىنگەن. جاردەماقى العانداردىڭ 42 پايىزى قالادا، 58 پايىزى اۋىلدا تۇرادى.
"ازاتتىق" راديوسى
