Saparbaevtyń sózinshe, 200-300 myń teńge (520-700 dollar) tabatyn otbasylar tabysyn 40-60 myń teńge (103-155 dollar) dep kórsetken.
Mınıstr orynbasary otbasylardyń tabysy olardyń zeınetaqy qory salymdaryna baılanysty tekserilgenin aıtty. Onyń sózinshe, qazir úkimet pen ákimdikter otbasylardyń naqty qansha tabysy baryn anyqtaý úshin jumys istep jatyr.
17 tamyzda Qazaqstan eńbek jáne halyqty áleýmettik qorǵaý mınıstrligi 21 myń otbasy ataýly kómek alý úshin tabysyn jasyrǵan dep málimdegen.
Bıyl aqpanda elde kóp balaly áıelderdiń bılikke talaby kúsheıgen tusta Qazaqstan úkimeti turmysy tómen otbasylarǵa ataýly áleýmettik kómek tóleıtinderin jarııalaǵan. Analar narazylyǵy 4 aqpanda Nur-Sultanda ýaqytsha baspanadaǵy órtten keıin bastalǵan. Sol oqıǵadan bir otbasynyń bes balasy qaza tapqan.
27 aqpanda “Nur Otan” partııasynyń jıynynda sol kezdegi el prezıdenti Nursultan Nazarbaev turmysy tómen otbasylarǵa áleýmettik kómekti 70 paıyzǵa ósirýdi, kóp balaly otbasylardyń ár balasyna 21 myń teńge tóleýdi buıyrǵan. Keıin parlament ataýly áleýmettik kómek týraly zań qabyldap, oǵan Nazarbaevtyń ornyna kelgen qazirgi prezıdent Qasym-Jomart Toqaev qol qoıǵan.
Sáýirden bastap jergilikti bılik otbasylardan áleýmettik kómekke qujat qabyldaı bastaǵan. Biraq áıelder qujat ótkizýdiń qıyndyǵyn aıtyp, jıi shaǵymdanady.
21 tamyzda “Nur Otan” jıynynda partııa tóraǵasy Nazarbaev kóp balaly áıelder men shetelden kóship kelgen qazaqtardy “bılikten kómek suraı beredi” dep sókti.
- "Maǵan ber, meniń balam kóp, aılyǵym az" deıdi. Sen ne oıladyń? Bul – seniń máseleń ǵoı, sen buryn memleketpen aqyldaspadyń ǵoı" dedi Nazarbaev partııa jıynynda.
Eńbek jáne halyqty áleýmettik qorǵaý mınıstrliginiń esebinshe, 15 tamyzdaǵy jaǵdaı boıynsha 1,8 mıllıon qazaqstandyq AÁK alǵan. Bıýdjetten AÁK tóleý úshin 103 mıllıard teńge (335 mln dollar) bólingen. Járdemaqy alǵandardyń 42 paıyzy qalada, 58 paıyzy aýylda turady.
"Azattyq" radıosy
