تۇركيادا ءبىر جاسار پاكىستاندىق سيام ەگىزدەرى مانال مەن ميرحانى اجىراتۋ وپەراتسياسى ءساتتى ءوتتى. بۇل تۋرالى Sky News ارناسى جاريالادى، دەپ حابارلايدى “ادىرنا” ۇلتتىق پورتالى.
14 ساعاتقا سوزىلعان وپەراتسيانى بريتاندىق حيرۋرگ نۋر ۋل وۆاسە دجيلاني جاسادى. ول كەزدەيسوق تاڭدالعان جوق. ماماننىڭ سيام ەگىزدەرىن بولۋدە ۇلكەن تاجىريبەسى بار. 2022 جىلى ول برازيليادا ءۇش جاسار ۇلداردى ءساتتى اجىراتتى، 2021 جىلى يزرايلدە ءبىر جاسار قىزدارعا، 2019 جىلى پاكىستاندا ەكى جاسار قىزدارعا وپەراتسيا جاسادى.
قىزداردىڭ تولىق ءبولىنۋى ءۇش اي ىشىندە ەكى حيرۋرگيالىق كەزەڭدى قاجەت ەتەتىنى اتاپ ءوتىلدى. ويتكەنى ەگىزدەردەن ماڭىزدى قان تامىرلارى مەن مي تىندەرىن بولگەن.
كۇردەلى وپەراتسياعا دايىندىق كەزىندە ماماندار انكاراداعى دارىگەرلەرگە وپەراتسيا بولمەسىندە نە كۇتەتىنىن تۇسىنۋگە كومەكتەسۋ ءۇشىن ەگىزدەردىڭ جوعارى اجىراتىمدىلىقتاعى 3D ۇلگىسىن جاسادى. سونىمەن قاتار، بۇل بريتاندىق كومانداعا الداعى حيرۋرگيالىق پروتسەدۋرالاردى دايىنداۋعا جانە قايتالاۋعا مۇمكىندىك بەردى.
وپەراتسيا كەزىندە دارىگەرلەر 3D كەسكىندەردى فيزيكالىق الەممەن بىرىكتىرەتىن جانە وپەراتسيا كەزىندە دالدىكتى جاقسارتۋ ءۇشىن قولدانىلعان ارالاس شىندىق تەحنولوگياسىن قولداندى.
"بۇل تەحنولوگيا ءبىزدىڭ كوپتەگەن كۇندەلىكتى وپەراتسيالارىمىزدى قاۋىپسىز، از ءينۆازيۆتى جانە تيىمدىرەك ەتەدى. بۇل قىزدار مەن ولاردىڭ وتباسىلارىنا تاۋەلسىز ءومىر ءسۇرىپ، بالالىق شاقتارىن تاماشالاي الاتىن جاڭا بولاشاق سىيلاۋ - ءبىز ءۇشىن ەرەكشە مارتەبە", - دەدى جيلاني.
مالىمەت بويىنشا، ءاربىر 60 مىڭ تۋىلعان نارەستەدە ءبىر جۇپ تۇيىسكەن ەگىزدەر تۋادى، ولاردىڭ تەك 5 پايىزى عانا باس سۇيەك، ياعني باسى بىرىككەن بالالار.
بولىنبەگەن بالالاردىڭ ءومىر ءسۇرۋ ۇزاقتىعى وتە تومەن. كرانيوپاگتاردىڭ شامامەن 40 پايىزى ءولى تۋىلادى نەمەسە بوسانۋ كەزىندە ولەدى ەكەن.
