2024 جىلدىڭ 19 قىركۇيەگىندە حالىقارالىق قاتىناستار سالاسىنداعى جەتەكشى ساراپشىلاردىڭ ءبىرى، پروفەسسور بارري بۋزان استانادا ءدارىس وقىدى.
وندا ول عالامدىق ءتارتىپتىڭ ترانسفورماتسياسى جونىندەگى كوزقاراسىمەن ءبولىستى.
پروفەسسوردىڭ پىكىرىنشە، حالىقارالىق جۇيە ەلەۋلى وزگەرىستەردىڭ الدىندا تۇر. اتاپ ايتساق، ءداستۇرلى باتىستىق قۇرىلىمدار ءوز ىقپالىن بىرتىندەپ جوعالتىپ، قىتاي سياقتى جاڭا ويىنشىلار جاھاندىق ارەنادا ءوزارا ارەكەتتەسۋدىڭ جاڭا ۇلگىلەرىن قۇرا باستادى.
لوندون ەكونوميكا جانە ساياسي عىلىمدار مەكتەبىنىڭ (LSE) پروفەسسورى، سەكيۋريتيزاتسيا تۇجىرىمداماسىنىڭ اۆتورى بۋزان جاھاندىق ساياساتتىڭ كوپپوليارلىققا قاراي اۋىسىپ جاتقانىن اتاپ ءوتتى. مۇندا جاڭا ەكونوميكالىق جانە ساياسي ورتالىقتار بارعان سايىن ماڭىزدى ءرول اتقارماق. ونىڭ ايتۋىنشا، بۇل وزگەرىس الداعى ونجىلدىقتاردا حالىقارالىق قاتىناستاردىڭ دامۋىنداعى شەشۋشى فاكتورعا اينالادى.
جيىن بارىسىندا قوزعالعان ماڭىزدى تاقىرىپتاردىڭ ءبىرى – جاھاندىق ەكولوگيالىق قاۋىپتەر. بۋزاننىڭ ايتۋىنشا، بۇل قاۋىپتەر ەكونوميكا، ساياسات جانە الەۋمەتتىك سالاعا بارعان سايىن ايتارلىقتاي اسەر ەتۋدە. ول كليماتتىڭ وزگەرۋ سالدارىمەن كۇرەسە الماۋ كەدەيلىك ماسەلەلەرىن ۋشىقتىرىپ، جاڭا قاقتىعىستارعا اكەلۋى مۇمكىن ەكەنىن باسا ايتتى.
وسى قيىندىقتارعا قاراماستان، پروفەسسور وپتيميستىك كوزقاراسىن ءبىلدىردى. ول قازىرگى وزگەرىستەرگە بەيىمدەلۋگە جانە يننوۆاتسيالىق شەشىمدەر ىزدەۋگە دايىن ەلدەر ءۇشىن جاڭا مۇمكىندىكتەر اشىلاتىنىن اتاپ ءوتتى. بۋزان قازىرگى جاھاندىق جۇيەنىڭ سىن-تەگەۋرىندەرىنە جاۋاپ بەرەتىن جانە بارلىق قاتىسۋشىلاردىڭ مۇددەلەرىن ەسكەرەتىن يكەمدى جانە ينكليۋزيۆتى حالىقارالىق قۇرىلىمداردى قۇرۋدىڭ ماڭىزدىلىعىن اتاپ ءوتتى.
شەتەلدىك ساراپشىلاردىڭ دارىستەرى جوباسى قازاقستاننىڭ حالىقارالىق قاتىناستار جونىندەگى كەڭەسىنىڭ (قاحق) باستاماسىمەن جانە "Qalam" جوباسىنىڭ قولداۋىمەن ىسكە اسىرىلعان. قاحق توراعاسى ەرلان قارين وسىنداي اعارتۋشىلىق جوبالاردىڭ الەۋمەتتىك-گۋمانيتارلىق عىلىمداردى دامىتۋ ءۇشىن اسا قاجەت ەكەنىن اتاپ ءوتتى.
Qalam – قازاقستان تاريحى مەن مادەنيەتى تۋرالى العاشقى مۋلتيمەديالىق اقپارات قۇرالى. جوباعا قازاقستان، اقش، كانادا، ۇلىبريتانيا جانە رەسەيدەن كەلگەن زەرتتەۋشىلەردىڭ حالىقارالىق توبى جۇمىس ىستەيدى. Qalam-نىڭ ماتەريالدارى قازاق، ورىس جانە اعىلشىن تىلدەرىندە قولجەتىمدى.
