تۇركىستان وبلىسىنىڭ وتىرار اۋدانىندا ءتورت بالاسىمەن بىرگە ءىز-ءتۇزسىز جوعالىپ كەتكەن ايەلدىڭ قايدا ەكەنى انىقتالدى، دەپ حابارلايدى "ادىرنا" ۇلتتىق پورتالى.
بۇل تۋرالى جۋرناليست گۇلميرا ابىقاي دابىل قاققان ەدى.
ايەل مەن بالالارىنىڭ امان ەكەنى تۋرالى اقپاراتتى تۇركىستان وبلىسى پوليتسيا دەپارتامەنتى راستادى. پوليتسيانىڭ مالىمەتىنشە، اۋدان تۇرعىنى جۇبايىنىڭ ءتورت بالاسىن ەرتىپ ۇيدەن شىعىپ كەتكەنىن جانە بىرنەشە كۇن بويى بايلانىسقا شىقپاعانىن ايتىپ، قۇقىق قورعاۋ ورگاندارىنا جۇگىنگەن. وسىدان كەيىن جەدەل ىزدەستىرۋ شارالارى قولعا الىنىپ، ىزدەۋگە وبلىستىق جانە اۋداندىق پوليتسيا بولىمدەرىنىڭ قىزمەتكەرلەرى جۇمىلدىرىلدى.
ىزدەستىرۋ بارىسىندا وڭىردەگى نەگىزگى جولدار باقىلاۋعا الىنىپ، كورشىلەس اۋماقتارعا دا باعدارلامالار جىبەرىلگەن. ناتيجەسىندە ايەل ءتورت بالاسىمەن بىرگە تاكسيمەن كەلە جاتقان كەزدە انىقتالىپ، پوليتسيا بولىمىنە جەتكىزىلدى. تەكسەرۋ كەزىندە ونىڭ وتباسىنداعى تۇرمىستىق كەلىسپەۋشىلىكتەن كەيىن بالالارىن ەرتىپ شىمكەنت قالاسىنا كەتكەنى بەلگىلى بولدى. ايەل ەشكىمگە ەسكەرتپەستەن پاتەر جالداپ تۇرعان.
پوليتسيانىڭ حابارلاۋىنشا، وتباسى مۇشەلەرىمەن پروفيلاكتيكالىق اڭگىمە جۇرگىزىلىپ، تۋىستارىنىڭ قاتىسۋىمەن ماسەلە ءوزارا كەلىسىممەن شەشىلگەن. قازىر ايەل مەن بالالارى ۇيىنە ورالعان.
