سۋ رەسۋرستارى ءمينيسترى 2024 جىلدىڭ باسىنان سولتۇستىك ارال تەڭىزىنە 1,9 ملرد تەكشە مەتر سۋ جىبەرىلگەنىن مالىمدەدى، دەپ حابارلايدى "ادىرنا" ۇلتتىق پورتالى قازاقپاراتقا سىلتەپ.
حالىقارالىق ارالدى قۇتقارۋ قورى باسقارماسىنىڭ وتىرىسىندا سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ سولتۇستىك ارالداعى جالپى سۋ كولەمى 22 ملرد تەكشە مەترگە جەتكەنىن حابارلادى.
18-ءشى قىركۇيەك كۇنى وتكەن ماڭىزدى جيىنعا تاجىكستان، تۇركىمەنستان، وزبەكستان جانە قىرعىزستاننان كەلگەن دەلەگاتسيالار قاتىستى.
«وزدەرىڭىز بىلەتىندەي، بۇگىنگى تاڭدا پرەزيدەنتىمىز حالىقارالىق ارالدى قۇتقارۋ قورىنىڭ باسشىسى بولىپ سايلاندى. قوردىڭ توراعاسى رەتىندە ءبىزدىڭ ەلىمىزگە ۇلكەن جاۋاپكەرشىلىك جۇكتەلگەن جانە ءبىز ورتالىق ازيانىڭ باسقا مەملەكەتتەرىمەن تىعىز قارىم-قاتىناستا بولامىز. بىرلەسىپ ارال تەڭىزىن ساقتاۋ بويىنشا ەلەۋلى ناتيجەلەرگە قول جەتكىزدىك جانە وسى باعىتتاعى جۇمىستى ءارى قاراي جالعاستىرۋعا نيەتتىمىز. بيىل سولتۇستىك ارالعا تۇراقتى تۇردە سۋ كەلەدى. سۋارۋ كەزەڭىنىڭ ورتاسىندا سىرداريا وزەنى ارقىلى تەڭىزگە سەكۋندىنا 80 تەكشە مەترگە دەيىن سۋ جىبەرىلدى. سالىستىرمالى تۇردە، ءبىر جىل بۇرىن سەكۋندىنا 6 تەكشە مەتر عانا بارعان بولاتىن. سوڭعى جىلدارى سولتۇستىك ارالدا سۋ كولەمى تومەندەدى، بىراق 2024 جىلدىڭ باسىنان سۋ دەڭگەيى قايتا كوتەرىلە باستادى جانە بۇگىندە 22 ملرد تەكشە مەترگە جەتتى. سولتۇستىك ارالدا سۋ كولەمىنىڭ ودان ءارى ۇلعايۋىن قامتاماسىز ەتۋ ءۇشىن ءبىز سۋ ديپلوماتياسىن كۇشەيتىپ، سولتۇستىك ارال تەڭىزىن قالپىنا كەلتىرۋ جونىندەگى جوبانىڭ ەكىنشى كەزەڭىن ازىرلەپ جاتىرمىز»، – دەدى سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ.
جيىن بارىسىندا قازاقستاننىڭ 2024-2026 جىلدارى حاقق توراعالىق ەتۋ كەزەڭىنە ارنالعان اتقارۋ كوميتەتىنىڭ جۇمىس جوسپارىن بەكىتىلدى. قۇجات قۇرىلتايشى مەملەكەتتەردىڭ باسشىلارى مەن حاقق پرەزيدەنتىنىڭ تاپسىرمالارىن ىسكە اسىرۋ، قوردىڭ ۇيىمدىق قۇرىلىمى مەن شارتتىق-قۇقىقتىق بازاسىن جەتىلدىرۋ جانە وزگە دە ماسەلەلەر بويىنشا 10 باعىتتان جانە 40-تان استام ءىس-شارادان تۇرادى.
