مەملەكەت باسشىسى قاسىم-جومارت توقاەۆتىڭ شاقىرۋىمەن گەرمانيانىڭ فەدەرالدى كانتسلەرى ولاف شولتس قازاقستانعا رەسمي ساپارمەن كەلدى. بۇل تۋرالى بۇگىن، 16 قىركۇيەكتە اقوردانىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى
قاسىم-جومارت توقاەۆ ولاف شولتسكە ريزاشىلىعىن ءبىلدىردى.
«گەرمانيا ۇكىمەتىنىڭ باسشىسى سوڭعى 14 جىلدا ەلىمىزگە العاش رەت ساپارمەن كەلىپ وتىر. سوندىقتان بۇل قادامىڭىزدىڭ تاريحي ءمانى زور. ەكىجاقتى ىنتىماقتاستىقتى دامىتۋعا جانە تاۋار اينالىمىنىڭ كولەمىن ۇلعايتۋعا تىڭ سەرپىن بەرەمىز دەپ سەنەمىن. گەرمانيا – ءبىزدىڭ ەۋروپاداعى، ءتىپتى جاھانداعى نەگىزگى سەرىكتەسىمىز. بۇل – وتە ماڭىزدى. ءبىز قارقىندى دامىپ كەلە جاتقان كوپقىرلى ىقپالداستىعىمىزعا باسا ءمان بەرەمىز. ءوزارا بايلانىستارىمىزدى ودان ءارى تەرەڭدەتۋگە جانە نىعايتۋعا بارلىق جاعدايدى جاسايمىز، – دەدى ول.
گەرمانيا كانتسلەرى ولاف شولتس قوناقجايلىق تانىتقانى ءۇشىن قازاقستان پرەزيدەنتىنە العىس ايتىپ، قازاق-گەرمان قارىم-قاتىناستارىن وركەندەتۋدىڭ ماڭىزدى ەكەنىن جەتكىزدى.
– ەلىڭىزگە ساپارمەن كەلۋگە شاقىرعانىڭىزعا، ەكىجاقتى بايلانىستاردى تالقىلاۋعا جانە ىنتىماقتاستىعىمىزدى ىلگەرىلەتۋگە مۇمكىندىك جاساعانىڭىزعا ريزاشىلىعىمدى بىلدىرەمىن. مەنىمەن بىرگە ىسكەر توپتاردىڭ بەلدى وكىلدەرى كەلدى، – دەدى فەدەرالدىق كانتسلەر.
اڭگىمەلەسۋ بارىسىندا ەكى ەلدىڭ ساياسي، ساۋدا-ەكونوميكالىق، مادەني-گۋمانيتارلىق بايلانىستارىن نىعايتۋ ماسەلەسى تالقىلاندى. اتاپ ايتقاندا، ەنەرگەتيكا، «جاسىل» ترانسفورماتسيا، ونەركاسىپ، تاۋ-كەن ءوندىرىسى، كولىك-لوگيستيكا، كليماتتىڭ وزگەرۋى، ەكولوگيا، اۋىل شارۋاشىلىعى جانە ءبىلىم بەرۋ سالالارىنداعى ىقپالداستىققا ايرىقشا ءمان بەرىلدى.
