الماتى وبلىسىندا 7 جىل بۇرىن پايدالانۋعا بەرىلگەن مەكتەپ اپاتتىق دەپ تانىلىپ، قيراپ قالعان، دەپ حابارلايدى “ادىرنا” ۇلتتىق پورتالى.
“پيسما پرەزيدەنتۋ” Telegram ارناسىندا مەكتەپتىڭ 2 ملرد تەڭگەگە سالىنعانى ايتىلدى. جازبادا الماتى وبلىسىنىڭ ىلە اۋدانىنداعى №40 مەكتەپتىڭ اپاتتى جاعدايداعى سۋرەتى پايدا بولدى.
“عيماراتتىڭ قۇرىلىسىنا حالىقتىڭ 2 ميلليارد تەڭگەسى جۇمسالدى. قازىر 3000-عا جۋىق بالا كورشى اۋىلدارداعى جاقىن ماڭداعى مەكتەپتەرگە بارۋعا ءماجبۇر. اكىمدىك عيماراتتى كۇردەلى جوندەۋگە قايتا 800 ميلليون تەڭگە ءبولۋدى جوسپارلاپ وتىر. بىراق اتا-انالار مۇنداي شەشىمگە قارسى. سەبەبى عيمارات ساپاسىز سالىنعان جانە بالالاردىڭ ومىرىنە قاۋىپ توندىرەدى. ەڭ تاڭقالارلىعى، ەشكىم لايىقتى جازاعا تارتىلماعان”، – دەلىنگەن جازبادا.
وسى جايتقا بايلانىستى الماتى وبلىسىنىڭ اكىمدىگى مەكتەپ جەر سىلكىنىسىنەن كەيىن اپاتتى جاعدايدا دەپ تانىلعانىن حابارلادى.
“قۇرىلىستىڭ ساپاسىن تەكسەرۋ ءۇشىن ارنايى كوميسسيا قۇرىلدى. كىنالىلەر جاۋاپكەرشىلىككە تارتىلىپ، قۇرىلىس كومپانياسىنا قاتىستى سوتتا ءىس قوزعالادى. ىلە اۋدانىنداعى №40 ورتا مەكتەپ وقۋشىلارى بورالداي كەنتىندەگى №17 جانە №54 ورتا مەكتەپتەرىندە ءبىلىم الاتىن بولدى. وقۋ پروتسەسىن ءتيىمدى ۇيىمداستىرۋ ماقساتىندا وقۋشىلاردى ءۇش اۋىسىمدا 8 اۆتوبۋسپەن تاسىمالداۋ جۇمىستارى جولعا قويىلدى. وقۋشىلاردىڭ ساباققا ۋاقتىلى كەلۋىن قامتاماسىز ەتۋ ءۇشىن ارنايى تاسىمالداۋ كەستەسى جاسالدى. سىنىپ جەتەكشىلەرى مەن كەزەكشى مۇعالىمدەر كۇن سايىن وقۋشىلاردى تاسىمالداۋ كەزىندەگى قاۋىپسىزدىك شارالارىنىڭ ساقتالۋىن قاتاڭ قاداعالايدى. سونىمەن قاتار، وقۋشىلاردىڭ ۋاقتىلى جانە ساپالى ىستىق تاماقپەن قامتاماسىز ەتىلۋىنە ەرەكشە كوڭىل ءبولىندى. مەكتەپ مەدبيكەسى وقۋشىلاردىڭ دەنساۋلىق جاعدايىن تۇراقتى تۇردە باقىلاۋدا ۇستايدى. وقۋ جىلىنىڭ العاشقى اپتاسىندا وقۋشىلار جاڭا وقۋ ۇردىسىنە تولىعىمەن بەيىمدەلدى”، – دەدى اكىمدىك.
