Almaty oblysynda 7 jyl buryn paıdalanýǵa berilgen mektep apattyq dep tanylyp, qırap qalǵan, dep habarlaıdy “Adyrna” ulttyq portaly.
“Pısma prezıdentý” Telegram arnasynda mekteptiń 2 mlrd teńgege salynǵany aıtyldy. Jazbada Almaty oblysynyń Ile aýdanyndaǵy №40 mekteptiń apatty jaǵdaıdaǵy sýreti paıda boldy.
“Ǵımarattyń qurylysyna halyqtyń 2 mıllıard teńgesi jumsaldy. Qazir 3000-ǵa jýyq bala kórshi aýyldardaǵy jaqyn mańdaǵy mektepterge barýǵa májbúr. Ákimdik ǵımaratty kúrdeli jóndeýge qaıta 800 mıllıon teńge bólýdi josparlap otyr. Biraq ata-analar mundaı sheshimge qarsy. Sebebi ǵımarat sapasyz salynǵan jáne balalardyń ómirine qaýip tóndiredi. Eń tańqalarlyǵy, eshkim laıyqty jazaǵa tartylmaǵan”, – delingen jazbada.
Osy jaıtqa baılanysty Almaty oblysynyń ákimdigi mektep jer silkinisinen keıin apatty jaǵdaıda dep tanylǵanyn habarlady.
“Qurylystyń sapasyn tekserý úshin arnaıy komıssııa quryldy. Kináliler jaýapkershilikke tartylyp, qurylys kompanııasyna qatysty sotta is qozǵalady. Ile aýdanyndaǵy №40 orta mektep oqýshylary Boraldaı kentindegi №17 jáne №54 orta mektepterinde bilim alatyn boldy. Oqý proesin tıimdi uıymdastyrý maqsatynda oqýshylardy úsh aýysymda 8 avtobýspen tasymaldaý jumystary jolǵa qoıyldy. Oqýshylardyń sabaqqa ýaqtyly kelýin qamtamasyz etý úshin arnaıy tasymaldaý kestesi jasaldy. Synyp jetekshileri men kezekshi muǵalimder kún saıyn oqýshylardy tasymaldaý kezindegi qaýipsizdik sharalarynyń saqtalýyn qatań qadaǵalaıdy. Sonymen qatar, oqýshylardyń ýaqtyly jáne sapaly ystyq tamaqpen qamtamasyz etilýine erekshe kóńil bólindi. Mektep medbıkesi oqýshylardyń densaýlyq jaǵdaıyn turaqty túrde baqylaýda ustaıdy. Oqý jylynyń alǵashqy aptasynda oqýshylar jańa oqý úrdisine tolyǵymen beıimdeldi”, – dedi ákimdik.
