توعىزقۇمالاق تاقتاسى عارىشقا ۇشىرىلدى

V دۇنيەجۇزىلىك كوشپەندىلەر ويىندارى اياسىندا توعىزقۇمالاقتان العاشقى ويىندار باستالدى. بۇل تۋرالى تۋريزم جانە سپورت مينيسترلىگى جاريالادى، دەپ حابارلايدى “ادىرنا” ۇلتتىق پورتالى.  ءبىر قىزىعى، 9 قىركۇيەكتە ساعات 09:09-دا قاتىسۋشىلار 9 ويىنشىدان تۇراتىن 9 ۇستەلدىك تاقتادا، 9-ۇيادان باستاپ ەسەپتەۋمەن سايىسقا ءتۇستى. سونىمەن قاتار، ەرەكشە ايتا كەتەتىن ماڭىزدى جاڭالىق – توعىزقۇمالاق تاقتاسىنىڭ عارىش كەڭىستىگىنە شىعۋى. رەسەي عارىش اگەنتتىگىمەن اراداعى كەلىسىم نەگىزىندە تاستارى بار تاقتا العاش رەت كوشپەندىلەر ويىندارى اياسىندا ستراتوسفەرا قاباتىنا شىعىپ، قايتادان جەرگە جەتكىزىلدى. ”بۇل ءىس-شارا – ۇستەل ويىندارىنىڭ جانكۇيەرلەرى ءۇشىن عانا ەمەس، بۇكىل قازاقستان ءۇشىن دە ماڭىزدى جاڭالىق. توعىزقۇمالاق – عارىشتا بولعان جالعىز ۇستەل ويىنى”، دەلىنگەن حابارلامادا. ايتا كەتەيىك، V دۇنيەجۇزىلىك كوشپەندىلەر ويىندارى اياسىندا توعىزقۇمالاق تۋرنيرىندە 41 ەلدەن، ونىڭ ىشىندە كولۋمبيا، بانگلادەش، فرانتسيا، گەرمانيا، اقش، قىتاي، لاتۆيا، افريكا جانە اراب ەلدەرىنەن كەلگەن 114 قاتىسۋشى باق سىنايدى.