V Dúnıejúzilik Kóshpendiler oıyndary aıasynda toǵyzqumalaqtan alǵashqy oıyndar bastaldy. Bul týraly Týrızm jáne sport mınıstrligi jarııalady, dep habarlaıdy “Adyrna” ulttyq portaly.
Bir qyzyǵy, 9 qyrkúıekte saǵat 09:09-da qatysýshylar 9 oıynshydan turatyn 9 ústeldik taqtada, 9-uıadan bastap esepteýmen saıysqa tústi.
Sonymen qatar, erekshe aıta ketetin mańyzdy jańalyq – toǵyzqumalaq taqtasynyń ǵarysh keńistigine shyǵýy. Reseı ǵarysh agenttigimen aradaǵy kelisim negizinde tastary bar taqta alǵash ret Kóshpendiler oıyndary aıasynda stratosfera qabatyna shyǵyp, qaıtadan jerge jetkizildi.
”Bul is-shara – ústel oıyndarynyń jankúıerleri úshin ǵana emes, búkil Qazaqstan úshin de mańyzdy jańalyq. Toǵyzqumalaq – ǵaryshta bolǵan jalǵyz ústel oıyny”, delingen habarlamada.
Aıta keteıik, V Dúnıejúzilik kóshpendiler oıyndary aıasynda toǵyzqumalaq týrnırinde 41 elden, onyń ishinde Kolýmbııa, Bangladesh, Franııa, Germanııa, AQSh, Qytaı, Latvııa, Afrıka jáne Arab elderinen kelgen 114 qatysýshy baq synaıdy.
