ەكى كۇننەن بەرى تولاسسىز جاۋعان جاڭبىر سالدارىنان استانا كوشەلەرىن سۋ باستى، - دەپ حابارلايدى “ادىرنا” ۇلتتىق پورتالى.
“قازگيدرومەتتىڭ مالىمەتىنشە، قازاقستان استاناسىندا ەكى كۇندە 48 ميلليمەتر جاۋىن-شاشىن ءتۇستى. نەگىزى قازىرگى ۋاقىتتاعى ايلىق نورما – 31 ميلليمەتر جاۋىن-شاشىندى قۇرايدى. وسىلايشا، ەكى تاۋلىكتە جاۋعان جاۋىن-شاشىن مولشەرى ءبىر جارىم ايلىق نورمادان اسىپ ءتۇستى”، دەپ ءتۇسىندىردى قالا اكىمدىگىنىڭ ءباسپاسوز قىزمەتى.
ونىڭ ايتۋىنشا، بارلىق كوممۋنالدىق قىزمەتتەر كۇشەيتىلگەن رەجيمدە جۇمىس ىستەپ جاتىر. بۇكىل قالا بويىنشا 200-دەن استام ارنايى تەحنيكا جۇمىلدىرىلعان جانە ولار سۋ سورۋ جۇمىستارىن جۇرگىزۋدە. سونىمەن بىرگە، سينوپتيكتەردىڭ بولجاۋىنشا، جاۋىن ءالى دە بىرنەشە ساعاتقا سوزىلادى.
«كوممۋنالدىق قىزمەتتەر كوللەكتورلار مەن جاڭبىر سۋى كىرەتىن جەرلەردى تازارتۋ، بۋ شىعارۋ قۇبىرلارى، سۋ سورۋ، نوسەر كارىز جۇيەلەرى مەن تازارتۋ قۇرىلىستارىن سالۋ بويىنشا تۇراقتى جۇمىس جۇرگىزۋدە»، - دەپ اتاپ ءوتتى اكىمدىكتە.
سۋ تاسقىنىنا بايلانىستى بىرقاتار كوشەلەردە كولىك قوزعالىسى شەكتەلدى:
- تۇران داڭعىلىنىڭ بويىمەن كەرەي جانە جانىبەك حاندار كوشەلەرىمەن ۇلى دالا داڭعىلىنا قاراي;
- حۋسەين بەن تالال كوشەسىنىڭ بويىمەن ۇلى دالا داڭعىلىنا قاراي;
- ۇلى دالا داڭعىلىنىڭ بويىمەن قابانباي باتىر داڭعىلىنان جانە ايتماتوۆ كوشەسىنەن;
- ناجىمەدەنوۆا كوشەسى تاۋەلسىزدىك كوشەسىنەن امانجولوۆا كوشەسىنە دەيىن.
قالا بيلىگى قالا تۇرعىندارى مەن قوناقتارىن مۇنداي قولايسىز اۋا رايى كەزىندە جولعا شىقپاۋعا شاقىردى.
