فۋتبولدان ۇلتتار ليگاسىنداعى قازاقستان مەن نورۆەگيا اراسىنداعى كەزدەسۋى تەڭ اياقتالدى. قوس قۇرامانىڭ جانكۇيەرلەرى تارتىستى ويىننىڭ كۋاسى بولدى.
الماتىداعى ورتالىق ستاديوندا وتكەن ويىننىڭ بيلەتتەرى ءبىر كۇندە ساتىلىپ كەتكەنى حابارلانعان ەدى. الايدا بۇل ويىندا دا 2 مىڭ مەن 10 مىڭ تەڭگە اراسىندا تۇراتىن بيلەتتەردى «پىسىقايلار» الىپ، ماتچ كۇنى باعاسىن اسپانداتقان ەدى. دەگەنمەن، 19:00-دە باستالعان ماتچتى قىزىقتاۋعا كەلگەن بيلەتى بار جانكۇيەر 20:00-گە دەيىن قاقپا الدىندا تۇرعان. بۇل تۋرالى «ادىرنا» ءتىلشىسى حابارلادى.
«ويىن ناتيجەسى نورۆەگيانىڭ جەڭىسىمەن اياقتالادى» دەپ بولجاعان سپورت ساراپشىلارىنىڭ ويى ورىندالمادى. الاڭعا جينالعان كورەرمەن دە نورۆەگيا قۇراماسىندا ويناپ جاتقان "مانچەستەر ءسيتيدىڭ" توپ شابۋىلشىسى ەرلينگ حوللاندتىڭ كوپ گول سوققان ويىنشى اتانادى دەپ سەنگەن ەدى. بىراق قازاقستان قۇراماسىنىڭ سپورتشىلارى قارسىلاستىڭ دوبىن قاقپاعا كىرگىزبەدى.
ويىن قالاي ءوربىدى؟
ويىننىڭ العاشقى بولىگىندە شەتتەن كەلگەن قوناقتار گول سالۋعا بىرنەشە رەت وقتالدى. نورۆەگيالىق فەليكس ميۋرەت قاقپا ماڭدايشاسىنان قايتتى. كەيىننەن كورەرمەن كوزايىمىنا اينالعان ەرلينگ حوللاندتىڭ باعىتتاعان دوبى شتانگاعا ءتيىپ، ەكىنشى ماتچتا دا ەسەپ اشىلمادى.
قازاقستان قۇراماسى اتىنان العاشقى مينۋتتان باستاپ شەتەلدىك كلۋبتاردا ويناپ جۇرگەن سپورتشىلارىمىز: نۇرالى ءالىپ، باكتيەر زاينۋتدينوۆ، رامازان ورازوۆ، ابات ايىمبەتوۆ سىندى الاڭعا شىقتى. قۇراما ۇزدىكتەرى بولعان باۋىرجان يسلامحان، ايبول ابىكەن، ابزال بەيسەبەكوۆ جانە جاراقاتىنا بايلانىستى ماكسيم سامورودوۆ قوسالقى قۇرامدا قالدى.
ۇلتتىق قۇرامانىڭ باس باپكەرى ستانيسلاۆ چەرچەسوۆويىن بارىسىندا سپورتشىلاردى الماستىرعانىمەن قارسىلاسقا ەشكىم گول سالمادى. ويىن ناتيجەسى تەڭ بولدى.
باس باپكەر نە دەيدى؟
ويىن اياقتالعان سوڭ ۇلتتىق قۇرامانىڭ باس باپكەرى چەرچەسوۆ باق وكىلدەرىنە پىكىرىن ءبىلدىردى.
- ءبىز جاڭا جولدى – ۇلتتار ليگاسى ويىنىن باستادىق. بۇل باسقا دەڭگەي، بىزگە ءار ويىن ماڭىزدى. ءبىزدىڭ مىندەتىمىز - ءار ويىنعا دايىندالۋ، قارسىلاستارىمىزعا قارسى شىعۋ جانە ولاردىڭ كەمشىلىكتەرىن ىزدەۋ. جىگىتتەردى باستاماسىمەن قۇتتىقتاپ، بەس دەگەن باعا بەرە الامىز. شابۋىلداۋشىلىقپەن ءالى دە جۇمىس ىستەۋىمىز كەرەك, - دەدى چەرچەسوۆ.
ال كوماندا كاپيتانى اسحات تاعىبەرگەن قارسىلاستاردىڭ سوققىسىن توقتاتۋ قيىن بولعانىن ايتتى.
- بىزدە جۇلدىز جوق، ءبىز ۇجىمبىز. ارينە، تەڭ ناتيجە – جاقسى ناتيجە، بىراق ءبىز ءوز الاڭىمىزدا ودان دا جاقسى ناتيجە كورسەتە الامىز. ودەگاارد پەن باسقا ويىنشىلارعا قارسى تۇرۋ قيىن بولدى، بىراق ءبىر ويىنشى ءبارىن شەشپەيدى دەيدى. ءيا، دەڭگەي جوعارى، بىراق ءبىز بىرلەسكەن كۇش-جىگەردىڭ ارقاسىندا قارسىلاستى توقتاتتىق. بۇگىنگى قولداۋ جوعارى دەڭگەيدە بولدى، جانكۇيەرلەرگە راحمەت, – دەيدى تاعىبەرگەن.
قازاقستان قۇراماسىنىڭ جارتىلاي قورعاۋشىسى باقتيار زاينۋتدينوۆ نورۆەگيامەن وتكەن ۇلتتار ليگاسىنىڭ ويىنىنان (0:0) كەيىن ءوزىنىڭ Instagram پاراقشاسىندا جانكۇيەرلەرىنە ارناپ، ۇندەۋ جاسادى.
«جانكۇيەرلەرىمىزدىڭ كەرەمەت قولداۋىنا راقمەت!» - دەپ جازدى زاينۋتدينوۆ.
جەلىدەگى پىكىرلەر
تانىمال بلوگەر ەرقانات بوكەي ويىن ناتيجەسىنەن سوڭ ۇلتتىق قۇراماعا العىس ايتىپ، جەلىدەگى پاراقشاسىنا ۆيدەو جاريالاعان. وقىرماندار ءتۇرلى پىكىر جازىپ، ويىندى قىزۋ تالقىلاپ جاتىر. دامير ەسىمدى جەلى قولدانۋشىسى:
«ال، جارايسىڭدار باۋىرلارىم، اياقتارىڭ اۋىرماسىن»، - دەپ جازعان.
«انگليامەن ويناعان سياقتى، تەڭ ەسەپكە قۋاناتىن سورلىمىز با؟» - دەپ ماليكا ەسىمدى ازامات پىكىر قالدىرعان.
بەلگىسىز ەسىمدى وقىرمان: «تەك زاينۋتدينوۆ، ۆوروگوۆسكي، ءنۇرالى مەن ويىن سوڭىنا قاراي سومورودوۆ قانا وينادى»، - دەپ جازعان.
«جارادىڭدار بالالار، وتە جاقسى ويىن بولدى»، «التىن سپورتشىلار»، «جارايسىڭدار، ۇزدىكسىڭدەر» دەپ پىكىر قالدىرعان وقىرماننىڭ سانى كوپ.
ەندى 9 قىركۇيەكتە قازاقستان قۇراماسى ليۋبليانادا سلوۆەنيا قۇراماسىمەن كەزدەسەتىن بولادى.
سىمبات ناۋحان
«ادىرنا» ۇلتتىق پورتالى
