اقتوبە وبلىسى تەمىر اۋدانى قوپا اۋىلىنداعى 9-سىنىپ وقۋشىسىنىڭ ولىمىنەن سوڭ مەكتەپ ديرەكتورى قىزمەتىنەن بوساتىلدى، كامەلەتكە تولماعان ەكى كۇدىكتى ەكى ايعا قامالدى. بۇل تۋرالى وبلىستىق پروكۋراتۋرانىڭ ءباسپاسوز قىزمەتى مالىمدەدى، دەپ حابارلايدى “ادىرنا” ۇلتتىق پورتالى.
قر باس پروكۋرورىنىڭ تاپسىرماسىنان سوڭ اقتوبە وبلىسى تەمىر اۋدانى قوپا اۋىلىنداعى قىلمىستىق وقيعانى تەرگەۋ جۇمىسىن وبلىس پروكۋرورى ح.داۋەشوۆ جەكە باقىلاۋىنا الدى.
«قر قىلمىستىق پروتسەستىك كودەكستىڭ 128-بابىنىڭ تارتىبىمەن كامەلەتكە تولماعان 2 كۇدىكتى ۇستالدى. تەمىر اۋداندىق سوتى 2 اي مەرزىمگە قاماۋعا الۋ تۇرىندەگى بۇلتارتپاۋ شاراسىن سانكتسيالادى. وقيعا بويىنشا تەرگەپ-تەكسەرۋدى اقتوبە وبلىستىق پوليتسيا دەپارتامەنتىنىڭ جەدەل-تەرگەۋ توبى جۇرگىزىپ جاتىر. قاداعالاۋدى جۇزەگە اسىرۋ تاجىريبەلى پروتسەسسۋالدىق پروكۋرورلار توبىنا جۇكتەلدى. وبلىستىق پروكۋراتۋرا جەرگىلىكتى اتقارۋشى ورگاننىڭ اتىنا تەمىر اۋدانى اكىمىنىڭ، وبلىستىق ءبىلىم باسقارماسى جانە اۋداندىق ءبىلىم ءبولىمىنىڭ لاۋازىمدى تۇلعالارىنىڭ جاۋاپكەرشىلىگىن شەشۋ جونىندە ۇسىنىس ەنگىزدى. بۇگىنگى كۇنى قاداعالاۋ اكتىسىمەن قوپا اۋىلىنداعى مەكتەپتىڭ ديرەكتورى ر.ە.قارجاۋوۆ قىزمەتىنەن بوساتىلدى. باسقا مالىمەتتەر تەرگەۋ مۇددەسىنە قاتىستى جاريالانبايدى»، - دەپ حابارلادى اقتوبە وبلىستىق پروكۋراتۋراسىنىڭ ءباسپاسوز قىزمەتى.
ەسكە سالساق، 2 قىركۇيەك كۇنى قوپا اۋىلىندا وقۋشىلار توبەلەسىپ، 9-سىنىپ وقۋشىسى قايتىس بولعان. باس پروكۋرور بەرىك اسىلوۆ بۇل ءىستى جەكە باقىلاۋىنا العانىن حابارلادى.
